Туркияда бўлиб турган Ўзбекистон фуқаролари огоҳлантирилди. Мамлакатнинг Истанбулдаги Бош консулхонаси ўзбекистонликларга мурожаат билан чиқди.
Унга кўра, ҳозирги кунда Туркия полицияси томонидан ноқонуний миграцияга қарши курашиш доирасида йирик шаҳарлар ва жамоат жойларида “махсус рейдлар” давом эттирилмоқда. Туркияда бўлиш қоидаларини бузган ва қўлга олинган хорижликлар орасида Ўзбекистон фуқаролари ҳам бўлиб, уларнинг аксарияти Истанбул шаҳридан бошқа вилоятлардаги репатриация марказлари (Geri gönderme merkezi)га юборилаётгани кузатилмоқда.
Келиб тушган аризаларга мувофиқ, Бош консулхона томонидан Туркия полицияси ва Миграция хизмати (Göç İdaresi) орқали фуқароларнинг ҳолати ўрганилганда, уларнинг ёнида шахсни тасдиқловчи ҳужжати (паспорт, İkamet İzni) бўлмагани ёки Туркияда яшаш ва ишлаш қоидаларини бузганликлари аниқланди.
“Шу муносабат билан, яна бир бор Туркияда бўлиб турган фуқароларимиздан маҳаллий қонунларга тўлиқ риоя этишни, ўзлари билан шахсни тасдиқловчи (паспорт) ва Туркияда яшаш рухсатини берувчи (İkamet İzni) ҳужжатларни олиб юришни сўраймиз”, — дейилади мурожаатда.
Изоҳ (0)