Сидней полицияси ходимлари хусусий мулкка ноқонуний кириш ҳақидаги чақирув бўйича воқеа жойига бориб, бирйўла бир нечта жиноятларни фош этди. Бу ҳақда ABC News хабар берди.
Улар квартиралардан бирида нархи 1 миллиард долларга тенг бўлган 722 кг кокаин топди.
Қўнғироқ душанба куни эрталаб Сидней шимолидаги кўп қаватли уйдан келган. Воқеа жойига етиб келган полиция атрофни ва бинонинг ўзини текширди. Улар ерости автотураргоҳда ичида тўрт нафар йигит бўлган Toyota Yaris машинасини топди. Полицияга улар шубҳали кўринди, чунки йигитларнинг тўртови ҳам қора кийим ва ниқобда эди.
Машинани кўздан кечириш чоғида эшикларни очиш учун асбоблар, бир нечта пичоқлар, фонарлар, пластик боғичлар топилди — бу тўплам одатда ўғрилик ёки босқинчилик пайтида қўлланади.
Ўша куни полиция мазкур тўрт киши кимни ўғирламоқчи бўлганини аниқлади ва тахмин қилинган қурбон билан ҳаммаси жойида ёки йўқлигини текшириш учун ўша уйга борди. Бироқ 24 ёшли йигит полициячиларни кўриб, қочишга уриниб, балкондан сакраган. Лекин у қўлга олинди. Йигитнинг квартирасидаги тинтув чоғида полициячилар 722 кг кокаин топдилар. Бу Сидней полицияси томонидан қўлга киритилган энг йирик кокаин партияси бўлиб, унинг нархи 1 миллиард долларни ташкил қилиши айтилмоқда.
Барча беш кишининг шахси аниқланган. 19 ёшдан 24 ёшгача бўлган тўрт нафар йигитга қуролли талончиликка уриниш, ўғрилик қуролларини сақлаш, жиноий гуруҳда иштирок этиш ва бошқа моддалар бўйича жиноий иш қўзғатилган. Уларнинг қурбонига айланиши мумкин бўлган йигитга эса тақиқланган гиёҳванд моддани етказиб бериш ва жиноятдан олинган даромадларни онгли равишда ишлатиш айби қўйилган.
Изоҳ (0)