Россия ҳукумати наркотик моддалар савдосига қарши кураш учун Тожикистон ҳукуматига 250 миллион рублдан (2,7 миллион доллар) ортиқ маблағ юборади. Моддий ёрдам кўрсатиш тўғрисидаги банд икки давлат тегишли идоралари ўртасидаги ҳамкорлик тўғрисидаги ҳужжатда мустаҳкамланган, деб хабар берди “ТАСС” Россиянинг Душанбедаги элчихонасига таяниб.
Ҳамкорлик шартномаси Тожикистон президенти ҳузуридаги Наркотик моддаларни назорат қилиш агентлиги ва Россия Ички ишлар вазирлиги ўртасида имзоланган. Томонлар маблағ ажратишдан ташқари, наркотик моддаларнинг ноқонуний айланишига қарши курашда хавфсизлик кучларининг ўзаро ҳамкорлиги даражасини оширишга келишиб олган.
Тожикистон томонининг аниқлик киритишича, ҳужжат 2023—2025 йилларга мўлжалланган.
Давлатлараро шартномани имзолаш маросимида Россиянинг Душанбедаги элчиси Семён Григорев иштирок этган ва Тожикистон Наркотик моддаларни назорат қилиш агентлиги раҳбари Ҳабибулло Воҳидзода билан бир қатор долзарб муаммоларни муҳокама қилган. Хусусан, расмийлар Афғонистондан тақиқланган моддалар контрабандаси кўпайиб бораётганидан хавотир билдириб, Тожикистон бу мамлакатдан наркотик моддалар олиб келинишининг олдини олишда муҳим рол ўйнашини таъкидлаган.
Тожикистон президенти Эмомали Раҳмон сентябрь ойида Нью-Йоркда бўлиб ўтган БМТ Бош Ассамблеясининг 78-сессиясида гиёҳванд моддалар савдосининг кучайиши муаммоси ҳақида гапирганди. Давлат раҳбари биргина сўнгги икки йил ичида Тожикистон хавфсизлик кучлари томонидан Афғонистон билан чегарада 10 тоннадан ортиқ тақиқланган моддалар ва гиёҳвандлик воситалари мусодара қилинганини таъкидлаган.
Изоҳ (0)