“Олти ойлик боланинг қўлида ҳам телефон”. Шифокор Зулфия Мақсудова болаларда миопия кўпайиб бораётганини айтди

Бугунги кунда Ўзбекистонда ёшлар, айниқса болаларда миопия (узоқни кўра олмаслик) хасталиги кўп учрамоқда. Бу ҳақда “Доктор Мақсудова клиникаси” асосчиси, шифокор Зулфия Мақсудова маълум қилди.

Зулфия Мақсудованинг айтишича, ҳозирда кўз хасталиги билан шикоят қиладиган ҳар учинчи ёки тўртинчи беморда миопия аниқланмоқда.

“Жаҳон соғлиқни сақлаш ташкилоти прогнозларига кўра, 2050 йилга бориб Ер юзининг ярим аҳолиси миопия билан касалланади. Ҳозирда дунёда 30 фоизгача инсонлар узоқни кўра олмаслик билан хасталанган. Биз Ўзбекистон Офтальмологлар ассосиацияси билан биргаликда Тошкент шаҳри Мирзо Улуғбек туманининг қатор мактабларида бўлиб, болаларда бепул текширувлар ўтказдик. Шунда иқрор бўлдикки, болаларимизнинг 30 фоизи айнан миопия билан хасталанган экан. Энг ачинарлиси, ўша 30 фоиз болаларнинг ичида 40 фоизининг ота-онаси фарзандининг кўзи яхши кўрмаслигини билмайди.

Бугунги техник прогресс пайтида бу жуда катта муаммо. Ҳамма болаларнинг қўлида телефон. Эътибор берган бўлсангиз, 6 ойлик боланинг ҳам қўлида телефон бор. Компьютерларни-ку гапирмаса ҳам бўлади. Бу нарса албатта, миопиянинг янада кўпайишига олиб келади. Авваллари миопияни 10-15 ёшли болаларда аниқлаган бўлсак, ҳозир 3-4 ёшлиларида ҳам учрамоқда. Яъни у эрта бошланяпти, чунки болалар қўлига гаджетлар жуда эрта бериляпти”, — деди шифокор “Доктор Мақсудова клиникаси”нинг янги филиали ва инновацион линзалар ишлаб чиқариш лабораторияси очилишида.

Зулфия Мақсудованинг қўшимча қилишича, дунёда узоқни кўра олмасликни даволаш бўйича фаол илмий изланишлар олиб бориляпти.

“Масалан, ҳозир шундай линзалар ишлаб чиқилмоқдаки, уларни кечаси ухлашдан олдин кўзларга қўйилади. Эрталаб уйқудан тургач, олинади. Шунда миопия билан хасталанган кўзнинг кўриш даражаси 100 фоизга тикланади. Бу кун бўйи юришга етади. Кечаси яна кўзларга қўйиш керак бўлади. Бундай линзалар миопия ўсишини тўхтатади. Агарда болалардан гаджетни олиб қўя олмас, техник прогрессни тўхтата олмас эканмиз, янги инновациялар орқали муаммога ечим излашимиз лозим”, — деди офтальмолог.

Маълум қилинишича, тунги линзалар кўриш ўткирлигини таъминлаб, миопия ўсишини тўхтатади ёки 85 фоиз ҳолатда хасталик ривожланишини секинлаштиради.