Ўзбекистон Марказий банки ноябрь ойи учун аҳоли ва тадбиркорлик субъектлари томонидан сезилган инфляция даражаси ҳақидаги маълумотларни эълон қилди.
Унга кўра, аҳоли томонидан сезилган инфляция даражаси 12,7 фоизни ташкил этган. Ҳудудлар кесимида инфляциянинг энг юқори даражаси Тошкент шаҳри — 15 фоиз ва Сирдарё вилоятида — 13,5 фоиз, энг паст даражаси Навоий вилояти ва Қорақалпоғистон Республикасида — 10,7 фоиз сезилган.
Ноябрда аҳоли энг кўп бензин ва ёнилғи, гўшт ҳамда сут нархи ошганини сезган. Нархлар ўсиши маиший хизматлар, алоқа ва интернет, таъмирлаш хизматларида энг кам сезилган.
Соҳалар кесимида аҳоли томонидан энг юқори сезилган инфляция даражаси пенсионерлар (14,8 фоиз) ва илм-фан/таълим (13,5 фоиз) соҳаларида, энг паст сезилган инфляция ташиш хизматлари (10 фоиз) соҳасида қайд этилган.
Ўзбекистонда 2023 йилнинг октябрь ойида истеъмол секторидаги товарлар ва хизматлар ўртача 1 фоизга ошгани тўғрисида хабар берилганди. Марказий банк 2023 йил якуни бўйича инфляция даражаси 8,5–9,5 фоиз атрофида бўлишини прогноз қилганди. 2022 йилда йиллик инфляция 12,3 фоизни ташкил этган. 2021 йилда бу кўрсаткич 9,98 фоиз, 2020 йилда 11,1 фоиз, 2019 йилда 15,2 фоиз, 2018 йилда 14,3 фоиз, 2017 йилда 14,4 фоиз бўлган.
Изоҳ (0)