Россия Ички ишлар вазирлиги ноқонуний мигрантлар учун бир қатор чекловларни назарда тутувчи “назорат остида қолиш” режими тўғрисидаги қонун лойиҳасини тайёрлади. Бу ҳақда “ТАСС” хабар берди.
Қонун лойиҳасига кўра, вақтинчалик Россияда қолиш муддати ўтган ёки миграция рўйхатидан ўтказишда атайлаб ёлғон маълумот ёки ҳужжатлар тақдим этган чет эл фуқаролари махсус реестрга киритилади. Ушбу реестрга визаси, қочқинлик мақоми, вақтинчалик бошпана ёки фуқаролиги бекор қилинганлар ҳам киради.
Улар учун Ички ишлар вазирлиги автомобиль сотиб олишни, якка тартибдаги тадбиркор сифатида рўйхатдан ўтишни, шунингдек, кўчмас мулкни кадастр реестрида қайд этишни тақиқлашни таклиф қилмоқда.
Шунингдек, “назорат остида қолиш” режимидаги хориж фуқароларининг автомобиль ҳайдашини чеклаш таклиф қилинмоқда. Уларга “права” бериш ёки алмаштириш, ҳисоб очиш, пул ўтказиш ёки турмуш қуриш рад этилиши мумкин.
Тахминларга кўра, мигрантлар ўзларининг жойлашган жойи, яшаш жойи ўзгаргани, шунингдек, Россиядан чиқиб кетиш санаси, жойи ва йўналиши тўғрисида Ички ишлар вазирлигига ҳам маълум қилишлари керак бўлади. Ҳуқуқбузарликлар учун хорижликларни депортация қилиш ёки “махсус муассасаларга” жойлаштириш таклиф этилади.
Изоҳ (0)