Банкларда сўмдаги кредит фоизлари аҳоли учун сезиларли ошди

Марказий банк 2023 йилнинг ўтган даврида кредит фоизлари қандай ўзгаргани бўйича инфографика эълон қилди.

Хусусан, ноябрь ойида аҳолига ажратилган сўмдаги кредитлар фоизлари жорий йилдаги энг юқори даражага етиб, 25,1 фоизни ташкил қилди. Тадбиркорлар учун кредитлар эса 22,5 фоиздан ажратилган.

Инфографикага кўра, кредитлар январь ойида аҳолига 22,9 фоиздан (11 ойда 2,2 фоиз ўсган), бизнесга 22 фоиздан (0,9 фоиз ўсган) берилган.

Аҳолига чет эл валютасидаги банк кредитлари қисқа муддатга 9,6 фоиздан, узоқ муддатга 9,6 фоиздан ажратилган.

Аввалроқ Марказий банк раиси мамлакат аҳолиси кредитни асосан нимага олаётганини очиқлаганди.

“Сўров натижасида аҳолида автокредитлар, микроқарз, микрокредит ҳамда ипотека кредитларига талаб юқори экани аниқланди”, — деган Мамаризо Нурмуродов.