Иш ҳақларига қўшимча равишда тўланган устама ва мукофот пуллари пенсия ҳисоблашда инобатга олинади. Бу ҳақда Пенсия жамғармаси маълумот берди.
Қайд этилишича, ҳукуматнинг 2022 йил 13 октябрдаги қарори асосида тасдиқланган “Давлат пенсияларини тайинлаш ва тўлаш тартиби тўғрисидаги низомни тасдиқлаш ҳақида”ги низомининг 82-бандига мувофиқ:
- пенсия ҳисоблашда иш ҳақи таркибига, шунингдек, иш ҳақининг натурал қисмига 2019 йил 1 январга қадар бўлган давр учун қонунчиликка мувофиқ суғурта бадаллари;
- 2019 йилдан кейинги давр учун Ўзбекистон Республикаси Солиқ кодексининг 371-моддасида кўрсатилган меҳнатга ҳақ тўлаш тарзидаги барча даромадлар киритилади.
“Яъни фуқароларнинг меҳнат фаолиятлари давомида олган иш ҳақларига қўшимча равишда тўланган устама ва мукофот пуллари пенсия ҳисоблашда инобатга олинади”,—дея маълум қилди жамғарма.
Пенсия миқдори иш стажининг муддатига боғлиқ бўлиб, қуйидагилардан таркиб топади:
- пенсиянинг таянч миқдоридан;
- иш стажи учун пенсиянинг оширилишидан;
- пенсияга қўшиладиган устама ҳақлардан.
Ишламайдиган пенсионерларга пенсияларни яшаб турган жойдаги Пенсия жамғармаси бўлимлари тўлайди. Ишлаётган пенсионерларга пенсия иш жойида тўланади.
Пенсионерларга пенсия уларнинг хоҳишига кўра, доимий яшаш ёки вақтинча турган жойдаги Пенсия жамғармаси бўлимлари томонидан нақд пулда ёки тўловни банк картасига ўтказиш йўли билан тижорат банкининг филиали орқали тўланади.
Изоҳ (0)