Венгрия бош вазири Виктор Орбан Европа Иттифоқининг Украинага 50 миллиард евро миқдорида иқтисодий ёрдам ажратиш қарорига вето қўйганини маълум қилди.
“Тунги смена якунлари: Украина учун қўшимча пулга вето, кўп йиллик бюджетни қайта кўриб чиқишга вето. Тегишли тайёргарликдан сўнг келаси йили ЕИ саммитида бу масалага қайтамиз”, — деб ёзди Орбан Х’да (собиқ Twitter).
ЕИ давлатлари раҳбарлари Украинага ёрдам кўрсатишни Европа Иттифоқи бюджет режасига киритиш бўйича келиша олмагани ҳақидаги хабарни Европа кенгаши раҳбари Шарл Мишел ҳам тасдиқлади. Унинг сўзларига кўра, бунга фақат бир давлат қарши чиққан. Мишел қайси давлат эканини очиқламади, лекин у ЕИ бу масалани кўриб чиқишга кейинги йил бошида қайтишни қўшимча қилди.
Айни вақтда, деб ёзади BBC News, Нидерландия бош вазири Марк Рютте Европа Иттифоқи етакчилари келаси йили Украинага узоқ муддатли ёрдам кўрсатиш бўйича келишиб олишига ишонч билдирган.
“Бизда ҳали вақт бор, Украинанинг пули яқин бир неча ҳафтада тугамайди”, — деди Рютте.
Аввалроқ Европа кенгаши Украина билан Европа Иттифоқига қўшилиш бўйича музокараларни бошлашга қарор қилгани маълум бўлганди. Венгрия бош вазири Виктор Орбан бунга бир неча бор қарши чиққан. У ЕИ раҳбарларининг музокараларни бошлаш қарори учун овоз бериш жараёнида қатнашмасдан, залдан чиқиб кетган. Қарорни тасдиқлаш учун иттифоққа аъзо барча мамлакатларнинг розилиги талаб этилади.
Эслатиб ўтамиз, октябрь ойида Брюсселда бўлиб ўтган Европа Иттифоқи саммити чоғида ҳам Словакия ва Венгрия Украинага 50 миллиард евролик ёрдам пакети ажратилишига қарши чиққанди.
Изоҳ (0)