Орбан Украинанинг Европа иттифоқига қўшилиши бўйича музокаралар бошлашдан норози бўлиб ЕИ саммитидан чиқиб кетди

Венгрия бош вазири Виктор Орбан Украинанинг Европа Иттифоқига қўшилиши бўйича музокараларни бошлаш қарорида иштирок этмаганини айтди.

Орбаннинг айтишича, Европа Иттифоқи раҳбарларининг учрашуви, жумладан, Украина билан музокараларни бошлаш масаласига бағишланган учрашув деярли саккиз соат давом этган. Унинг сўзларига кўра, Будапешт Киев бу музокараларни бошлашга тайёр эмас, деган позицияда қолади.

“Бундай шароитда Украина билан музокараларни бошлаш мутлақо бемаъни, мантиқсиз ва нотўғри қарор. Венгрия эса ўз позициясини ўзгартирмайди”, — деди у.

Орбаннинг таъкидлашича, қолган 26 давлат музокаралар бошланишини маъқуллашни талаб қилган.

“Агар бу давлатлар шундай қарор қилган бўлса, Венгрия ҳам ўз йўлидан боришга қарор қилди. Венгрия бу нотўғри қарорнинг бир қисми бўлишни истамайди ва шу сабабли бугунги қарорда иштирок этмади”, — деди Орбан.

Starting accession negotiations with #Ukraine is a bad decision. Hungary did not participate in the decision. pic.twitter.com/omYLSxefkI

— Orbán Viktor (@PM_ViktorOrban) December 14, 2023

Тhе Guardian нашри манбаларга таяниб ёзишича, Венгрия ҳукумати раҳбари ЕИ раҳбарларининг позицияси билан келишма олмагани учун саммитни тарк этган. Европа расмийлари аноним тарзда “Европа ҳақиқати” ва “Озодлик” радиосига Орбан овоз бериш вақтида мажлисни атайлаб тарк этгани ва Венгрия позициясини билдириш учун ўрнига ҳеч кимни қолдирмаганини айтди.

“Қонуний жиҳатдан бу қоидаларга мутлақо мос келади. Ҳа, биз Орбаннинг иштирокисиз қарор қилдик, лекин унинг орқасидан эмас. У ушбу қарорга овоз берилишини билиб туриб зални тарк этди”, — деди “Европа ҳақиқати”га Европа кенгаши президенти жамоаси вакили.

Украина Россия қўшинларининг кенг кўламли босқини бошланганидан сўнг дарҳол Европа Иттифоқига аъзо бўлиш учун ариза берганди. 14 декабрь куни ЕИ давлатлари етакчилари Украина ва Молдова билан Европа Иттифоқига қўшилиш бўйича музокараларни бошлаш, шунингдек, Грузияга ЕИ аъзолигига номзод мақомини бериш ҳақида қарор қабул қилди.

Европа Иттифоқини кенгайтириш қарори аъзо давлатлар томонидан бир овоздан маъқулланиши керак. Будапешт Киев билан музокараларни бошлаш қарорини блоклаш билан таҳдид қилган. Венгрия ҳукумати раҳбари Виктор Орбан Россия президенти Владимир Путиннинг Европадаги энг яқин иттифоқчиси саналади.