Венгрия бош вазири Виктор Орбан Европа Иттифоқини яна танқид қилиб, уни собиқ Советга қиёслади, шунингдек, СССРнинг “ёмон пародияси” деб атади.
“Баъзида тарих такрорланади. Москва фожиа эди. Брюссел шунчаки замонавийроқ пародияси”, — деди у 23 октябрь куни кечқурун Веспрем шаҳрида миллий байрами муносабати билан нутқ сўзлаб.
Шу билан бирга, Орбан Европа Иттифоқидан ҳали ҳам умид борлигини таъкидлади.
“Москвани энди тузатиб бўлмайди, лекин Брюссел ва Европа Иттифоқини тузатиш мумкин”, — деди у келаси йилга режалаштирилган Европа парламенти сайловларига ишора қилиб.
Венгрия бош вазири бу сайловда ҳамфикр партиялар ғалаба қозониб, Брюсселни миграция каби масалаларда ўз йўналишини ўзгартиришга мажбур қилишига умид билдирмоқда.
Орбаннинг Европа Иттифоқи билан зиддиятлари
2010 йилдан бери Венгрия ҳукуматини бошқариб келаётган Виктор Орбан бир неча бор Брюссел ва Совет Москваси ўртасида ўхшашлик борлигини айтган. У Европа Комиссияси билан йиллар давомида қонун устуворлиги, оммавий ахборот воситалари ва ноҳукумат ташкилотларни назорат қилиш ва бошқа мавзуларда тортишиб келади. Орбан Украинага қарши уруши сабабли Россияга қарши киритилган Европа Иттифоқи санкцияларига қўшилишни истамайди.
Ҳар йили 23 октябрь куни венгерлар Венгриянинг бир партиявий диктатураси ва Совет Иттифоқи таъсирига қарши 1956 йилги халқ қўзғолони бошланган пайтни хотирлайди. Совет армияси бу қўзғолонни шафқатсизларча бостирган. 1989 йилда Венгрияда коммунистик тузум қулаганидан кейин 23 октябрь мамлакатда миллий байрам деб эълон қилинди.
Изоҳ (0)