“Солиқ ҳамкор” орқали қилинган мурожаатлар асосида ноқонуний сотилаётган сигареталар мусодара қилинмоқда

Солиқ органлари томонидан савдо қоидаларига риоя этиш ҳолатларини ўрганиш мақсадида тадбиркорлик субъектларида назорат тадбирлари ўтказилиб келинади. Хусусан, ноқонуний тамаки маҳсулотлари савдосига чек қўйиш йўналишида ҳам ишлар олиб бориляпти.

Жорий йил бошидан бери 1 502 та назорат тадбирлари “Солиқ” мобил иловасининг “Солиқ ҳамкор” тизими орқали фуқаролар томонидан маркировка талабларини бузиш, ноқонуний тадбиркорлик фаолияти ва чек бермаслик бўйича юборилган мурожаатлар асосида ўтказилган.

Давлат солиқ қўмитаси берган маълумотларга кўра, назорат тадбирларида акциз маркасиз ҳамда рақамли маркировкаланмаган 127 минг қути, умумий қиймати 1,5 миллиард сўмлик тамаки маҳсулотлари савдога чиқарилгани аниқланиб, белгиланган тартибда олиб қўйилди.

Солиқ қўмитаси катта инспектори Лутфулла Бегматовнинг айтишича, республикада алкоголь ва тамаки маҳсулотлари савдоси билан шуғулланувчи 6 123 та тадбиркорлик субъекти мавжуд.

“Шундан 1 531 тасида сайёр солиқ текширувлари ўтказилди. Хусусан, 455 нафар фуқаро ноқонуний тамаки ва алкоголь маҳсулотлари сотаётган аниқланди. Назорат тадбирлари давомида 99 фоиз қонунбузилиш ҳолатлари ўз тасдиғини топди. Текширувлар натижасида 4,5 миллиард сўмлик алкоголь ва тамаки маҳсулотлари ноқонуний савдосининг олди олинди”,––деди мутахассис.

Таҳлилларга қараганда, Ўзбекистонда 2021 йилдан бошлаб тамаки маҳсулотлари ноқонуний савдосининг улуши тез ўсиб бормоқда. 2020 йил сентябрда ноқонуний савдо улуши 4,3 фоизни ташкил қилган бўлса, 2022 йилга келиб 14,9 фоизга етган. 2023 йилнинг июлида эса ўсиш суръати 24,8 фоизга чиққан.

Ҳисоб-китобларга кўра, жорий йилда тамаки маҳсулотлари бозорида тўланмаган акциз солиғи ва қўшилган қиймат солиғи бўйича бюджет йўқотишлари 1 триллион сўмни ташкил этади.

Муаммога қарши курашишда жамоатчилик назорати ҳам муҳим аҳамиятга эга. Савдо нуқталарида акциз маркасиз тамаки маҳсулотлари сотилаётганини кўрган фуқаролар “Солиқ” мобил иловасидаги “Солиқ ҳамкор” тизими орқали ҳолат бўйича мурожаат қилишлари мумкин.

Иловадан йўлланган мурожаат орқали савдо жойида текширув ўтказилади ва ноқонуний товарлар аниқланса, айбдорга чора кўрилади.

Шериклик ҳуқуқи асосида.