Soliq organlari tomonidan savdo qoidalariga rioya etish holatlarini o‘rganish maqsadida tadbirkorlik subyektlarida nazorat tadbirlari o‘tkazilib kelinadi. Xususan, noqonuniy tamaki mahsulotlari savdosiga chek qo‘yish yo‘nalishida ham ishlar olib borilyapti.
Joriy yil boshidan beri 1 502 ta nazorat tadbirlari “Soliq” mobil ilovasining “Soliq hamkor” tizimi orqali fuqarolar tomonidan markirovka talablarini buzish, noqonuniy tadbirkorlik faoliyati va chek bermaslik bo‘yicha yuborilgan murojaatlar asosida o‘tkazilgan.
Davlat soliq qo‘mitasi bergan maʼlumotlarga ko‘ra, nazorat tadbirlarida aksiz markasiz hamda raqamli markirovkalanmagan 127 ming quti, umumiy qiymati 1,5 milliard so‘mlik tamaki mahsulotlari savdoga chiqarilgani aniqlanib, belgilangan tartibda olib qo‘yildi.
Soliq qo‘mitasi katta inspektori Lutfulla Begmatovning aytishicha, respublikada alkogol va tamaki mahsulotlari savdosi bilan shug‘ullanuvchi 6 123 ta tadbirkorlik subyekti mavjud.
“Shundan 1 531 tasida sayyor soliq tekshiruvlari o‘tkazildi. Xususan, 455 nafar fuqaro noqonuniy tamaki va alkogol mahsulotlari sotayotgan aniqlandi. Nazorat tadbirlari davomida 99 foiz qonunbuzilish holatlari o‘z tasdig‘ini topdi. Tekshiruvlar natijasida 4,5 milliard so‘mlik alkogol va tamaki mahsulotlari noqonuniy savdosining oldi olindi”,––dedi mutaxassis.
Tahlillarga qaraganda, O‘zbekistonda 2021-yildan boshlab tamaki mahsulotlari noqonuniy savdosining ulushi tez o‘sib bormoqda. 2020-yil sentabrda noqonuniy savdo ulushi 4,3 foizni tashkil qilgan bo‘lsa, 2022-yilga kelib 14,9 foizga yetgan. 2023-yilning iyulida esa o‘sish surʼati 24,8 foizga chiqqan.
Hisob-kitoblarga ko‘ra, joriy yilda tamaki mahsulotlari bozorida to‘lanmagan aksiz solig‘i va qo‘shilgan qiymat solig‘i bo‘yicha budjet yo‘qotishlari 1 trillion so‘mni tashkil etadi.
Muammoga qarshi kurashishda jamoatchilik nazorati ham muhim ahamiyatga ega. Savdo nuqtalarida aksiz markasiz tamaki mahsulotlari sotilayotganini ko‘rgan fuqarolar “Soliq” mobil ilovasidagi “Soliq hamkor” tizimi orqali holat bo‘yicha murojaat qilishlari mumkin.
Ilovadan yo‘llangan murojaat orqali savdo joyida tekshiruv o‘tkaziladi va noqonuniy tovarlar aniqlansa, aybdorga chora ko‘riladi.
Sheriklik huquqi asosida.
Izoh (0)