Ўзбекистонда дам олиш куни ҳаво илиқлашади

Ўзбекистонга 17 декабрь куни илиқ ва қуруқ ҳаво кириб келиши кутилмоқда.

“Ўзгидромет” маълумотига кўра, қор ва совуқ об-ҳаво олиб келган совуқ антициклон тез чекинмоқда. Республика ҳудудининг катта қисмида ҳарорат кечалари 0-5 даража совуққача кучсизлашади, 15 декабрь куни кундузи ҳаво 4-9 даража илиқ бўлади. Республиканинг шимолида ҳам ҳаво илиқлашади, аммо кундуз куни ҳали ҳам ҳарорат 3-8 даража совуқ атрофида бўлади.

16 декабрь, шанба куни жанубий ҳудудлардан нам ҳаво массаси республиканинг марказий ҳудудларига тарқалади. Тошкент, Самарқанд, Жиззах, Сирдарё, Қашқадарё ва Сурхондарё вилоятларида ёмғир ва қор кўринишида бир оз ёғингарчилик бўлади. Кундузги ҳаво ҳарорати 0-5 даража илиққача пасаяди. Тоғли ҳудудларда асосан қор кўринишидаги ёғингарчилик бўлади.

17 декабрь, якшанба куни республикнинг барча ҳудудлари бўйича ёғингарчиликсиз об-ҳаво бўлиши кутилмоқда. Кечаси ҳарорат 0-5 даража совуқ, шимолда 5-10 даража совуқ, кундузи 2-7 даража илиқ бўлади.

Республика бўйича баъзи жойларга туман тушади. Айрим жойларда шамол 15-20 метр/секундгача кучайиши мумкин.

Тошкентда  жума ва якшанба куни ёғингарчилик кутилмайди, шанба куни вақти-вақти билан бир оз ёғингарчилик (ёмғир, қор) бўлади. Кечаси ва эрталаб туман тушиши мумкин.

Ҳарорат 15 декабрда 6-8 даража илиқ, 16—17 декабрда кечаси 3 даража совуқ-2 даража илиқ, кундузи 16 декабрда 0-2 даража илиқ, 17 декабрда 3-5 даража илиқ бўлади.