Украина президенти Владимир Зеленскийнинг АҚШ сенаторлари олдида видео ҳавола орқали сўзлаши режалаштирилган нутқи бекор қилинди. Бу ҳақда Сенатдаги Демократик кўпчилик раҳбари Чак Шумер маълум қилди.
“Айтганча, бугун Зеленский бизга қўшила олмайди... Сўнгги дақиқада нимадир юз берди”, — дея Шумернинг сўзларини келтиради Тhе Guardian.
Украина президенти нима сабабдан чиқиш қила олмаганига Шумер аниқлик киритмади.
Зеленский 5 декабрь куни сенаторлар билан гаплашиши керак эди. The Hill ёзганидек, Украина президенти сенаторларни урушдаги вазиятдан хабардор қилиб, Киевга ҳарбий ёрдам кўрсатишни давом эттиришга чақирмоқчи бўлган.
6 декабрь куни АҚШ Сенатида Украинага 60 миллиард долларлик янги ҳарбий ёрдам пакети ажратиш бўйича овоз бериш режалаштирилган.
АҚШ президенти Жо Байден октябрь ойида Конгрессдан 106 миллиард доллар, жумладан, Украинага ёрдам бериш учун 61,4 миллиард доллар ва Исроил учун эса 14,3 миллиард доллар ажратишни сўраганди. Республикачилар назоратидаги Вакиллар палатаси Украинага эмас, Исроилга пул ажратиш тўғрисидаги қонун лойиҳасини маъқуллади, шундан сўнг демократлар ҳужжатни Сенатда блоклашди.
Изоҳ (0)