Ўзбекистонда дарёлар ўзанларини тозалаш ва қирғоқларини мустаҳкамлаш, норуда фойдали қазилмаларни қазиб олишнинг атроф-муҳит, сув ва йўл хўжалиги объектларига салбий таъсири юзасидан Вазирлар Маҳкамасига юборилган парламент сўрови натижалари Олий Мажлис Сенатининг ялпи мажлисида яна бир бор муҳокама қилинди. Бу ҳақда парламент юқори палатаси матбуот хизмати хабар берди.
Қайд этилишича, Вазирлар Маҳкамасининг 666-сонли қарорига асосан Сирдарё вилояти ҳудудидан оқиб ўтган Сирдарё дарёси ўзанида 16 та тадбиркорлик субъекти томонидан дарё ўзанини тозалаш ишлари тартибсиз амалга оширилгани оқибатида дарё қирғоқлари емирилгани ва 4,6 минг метр куб ноқонуний қазиш ишлари олиб борилгани аниқланиб, уларга нисбатан табиий объектларга етказилган 7,4 миллиард сўм зарарни ундириш чоралари кўрилмоқда.
Жиззах вилоятида Сангзор дарёсининг 6 та нуқтасида бир қатор корхоналар ҳамда бошқа жисмоний шахслар томонидан ноқонуний қазиш бўйича аниқланган ҳолатлар юзасидан прокуратура томонидан жиноят иши қўзғатилган.
Самарқанд вилоятида олиб борилган назорат тадбирларида етказилган зарар суммалари аниқланиб, тўпланган ҳужжатлар вилоят прокуратурасига киритилган. Жумладан, “Самарқанд керамик” МЧЖ томонидан Нуробод тумани Сазағансой сойидан ноқонуний равишда қизил қум аралашмаси қазиб олингани натижасида табиий объектга 1,8 млрд сўм, “Мироншоҳ Миркомил” ХК томонидан Пастдарғом тумани Кимёгарлар қўрғонидан оқиб ўтувчи “Эски Анҳор” канали муҳофаза доирасидан ноқонуний равишда табиий қумни қазиб олганлиги натижасида табиий объектларга 3,6 миллиард сўм, Жомбой туманида жойлашган “Олмазор севинч” МЧЖ томонидан ноқонуний тарзда қум-шағал аралашмасини қазиб олгани натижаси табиатга 4,8 миллиард сўм миқдорида зарар етказилган.
Жами 58 та жиноят иши бўйича аниқланган ҳолатлар натижасида табиатга 61,5 миллиард сўм зарар етказилгани ҳисобланиб, уларни ундириш чоралари кўрилмоқда.
“Экология органлари томонидан тасдиқланган лойиҳа ҳужжатлари ҳамда экология экспертиза хулосалари талаблари асосида ўзан тозалаш ишлари юритилиши доимий равишда ўрганилмоқда. Жумладан, республика бўйича 311 та тадбиркорлик субъекти жойига чиққан ҳолда мониторинг қилинди”, — дейилади хабарда.
Тадбиркорлик субъектлари томонидан 8 километр дарё ва сой ўзанлари тозаланиб, 467 минг метр куб қум-шағал материаллари ҳисоби юритилган. Фуқаролар томонидан 33 та қоидабузарлик ҳолати содир этилгани аниқланиб, 166 миллион сўмлик жарималар қўлланилган.
Чирчиқ дарёси ўзанида юзага келган танг экологик аҳволни инобатга олиб, ўзан тозалаш ишларига жалб қилинган 18 та тадбиркорлик субъектининг фаолиятини босқичма-босқич тўхтатиш бўйича чоралар кўрилмоқда. Хусусан, 3 та тадбиркорлик субъекти билан тузилган шартнома бекор қилинган.
Бундан олдин Сангзор дарёси ўзанида ўтказилган экологик назорат рейд тадбирида учувчисиз учиш аппарати (дрон) орқали ҳуқуқбузарлик аниқлангани тўғрисида хабар берилганди.
Изоҳ (0)