Наманган вилоят прокуратурасининг Экология, атроф-муҳитни муҳофаза қилиш ва ўрмон хўжалиги соҳасидаги қонунчилик ижроси устидан назорат бўлими томонидан Поп ва Янги Наманган туманларида қум-шағал қазиб олиш ҳолатларини қонунийлиги юзасидан олиб борилган ўрганишда бир қатор қонунбузилиш ҳолатлари аниқланди. Бу ҳақда вилоят прокуратураси матбуот хизмати хабар берди.
Маълум қилинишича, Поп туманидаги “Ж.М.” фермер хўжалиги мансабдорлари томонидан 50 417 84 метр куб фойдали қазилмалар (қум) ноқонуний қазиб олиниб, давлат ва жамият манфаатларига 3,025 миллиард сўм зарар етказилган.
Шу каби, Янги Наманган туманидаги “Б.Х.” МЧЖ раҳбари А.А.нинг топшириғига кўра, жамият ишчилари томонидан 32 694 метр куб фойдали қазилмалар (тупроқ) ноқонуний қазиб олиниб, давлат ва жамият манфаатларига 122,6 миллион сўм зарар етказилган.
Ўрганиш якунига кўра, мазкур ҳолатлар юзасидан Жиноят кодексининг 192-11-моддаси (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) ва 229-моддаси (ўзбошимчалик) билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Аввалроқ Сурхондарёда хонадонига майнинг крипто-активлари қурилмаларини ўрнатганлар аниқлангани, Сурхондарёда ичимлик суви тармоғига ўзбошимчалик билан уланган фермер хўжаликлари 1,2 млрд сўм зарар етказилгани, Ўзбекистоннинг бир қанча ҳудудида газ таъминоти ходимлари табиий ресурслардан ноқонуний фойдалангани аниқлангани тўғрисида хабар берилганди.
Изоҳ (0)