O‘zbekistonda daryolar o‘zanlarini tozalash va qirg‘oqlarini mustahkamlash, noruda foydali qazilmalarni qazib olishning atrof-muhit, suv va yo‘l xo‘jaligi obyektlariga salbiy taʼsiri yuzasidan Vazirlar Mahkamasiga yuborilgan parlament so‘rovi natijalari Oliy Majlis Senatining yalpi majlisida yana bir bor muhokama qilindi. Bu haqda parlament yuqori palatasi matbuot xizmati xabar berdi.
Qayd etilishicha, Vazirlar Mahkamasining 666-sonli qaroriga asosan Sirdaryo viloyati hududidan oqib o‘tgan Sirdaryo daryosi o‘zanida 16 ta tadbirkorlik subyekti tomonidan daryo o‘zanini tozalash ishlari tartibsiz amalga oshirilgani oqibatida daryo qirg‘oqlari yemirilgani va 4,6 ming metr kub noqonuniy qazish ishlari olib borilgani aniqlanib, ularga nisbatan tabiiy obyektlarga yetkazilgan 7,4 milliard so‘m zararni undirish choralari ko‘rilmoqda.
Jizzax viloyatida Sangzor daryosining 6 ta nuqtasida bir qator korxonalar hamda boshqa jismoniy shaxslar tomonidan noqonuniy qazish bo‘yicha aniqlangan holatlar yuzasidan prokuratura tomonidan jinoyat ishi qo‘zg‘atilgan.
Samarqand viloyatida olib borilgan nazorat tadbirlarida yetkazilgan zarar summalari aniqlanib, to‘plangan hujjatlar viloyat prokuraturasiga kiritilgan. Jumladan, “Samarqand keramik” MCHJ tomonidan Nurobod tumani Sazag‘ansoy soyidan noqonuniy ravishda qizil qum aralashmasi qazib olingani natijasida tabiiy obyektga 1,8 mlrd so‘m, “Mironshoh Mirkomil” XK tomonidan Pastdarg‘om tumani Kimyogarlar qo‘rg‘onidan oqib o‘tuvchi “Eski Anhor” kanali muhofaza doirasidan noqonuniy ravishda tabiiy qumni qazib olganligi natijasida tabiiy obyektlarga 3,6 milliard so‘m, Jomboy tumanida joylashgan “Olmazor sevinch” MCHJ tomonidan noqonuniy tarzda qum-shag‘al aralashmasini qazib olgani natijasi tabiatga 4,8 milliard so‘m miqdorida zarar yetkazilgan.
Jami 58 ta jinoyat ishi bo‘yicha aniqlangan holatlar natijasida tabiatga 61,5 milliard so‘m zarar yetkazilgani hisoblanib, ularni undirish choralari ko‘rilmoqda.
“Ekologiya organlari tomonidan tasdiqlangan loyiha hujjatlari hamda ekologiya ekspertiza xulosalari talablari asosida o‘zan tozalash ishlari yuritilishi doimiy ravishda o‘rganilmoqda. Jumladan, respublika bo‘yicha 311 ta tadbirkorlik subyekti joyiga chiqqan holda monitoring qilindi”, — deyiladi xabarda.
Tadbirkorlik subyektlari tomonidan 8 kilometr daryo va soy o‘zanlari tozalanib, 467 ming metr kub qum-shag‘al materiallari hisobi yuritilgan. Fuqarolar tomonidan 33 ta qoidabuzarlik holati sodir etilgani aniqlanib, 166 million so‘mlik jarimalar qo‘llanilgan.
Chirchiq daryosi o‘zanida yuzaga kelgan tang ekologik ahvolni inobatga olib, o‘zan tozalash ishlariga jalb qilingan 18 ta tadbirkorlik subyektining faoliyatini bosqichma-bosqich to‘xtatish bo‘yicha choralar ko‘rilmoqda. Xususan, 3 ta tadbirkorlik subyekti bilan tuzilgan shartnoma bekor qilingan.
Bundan oldin Sangzor daryosi o‘zanida o‘tkazilgan ekologik nazorat reyd tadbirida uchuvchisiz uchish apparati (dron) orqali huquqbuzarlik aniqlangani to‘g‘risida xabar berilgandi.
Izoh (0)