Буюк Британияда судьялар энди қонуний қарорлар қабул қилишда ёрдам олиш учун сунъий интеллектга мурожаат қилишлари мумкин. Бу ҳақда The Telegraph хабар берди.
Британия судьялари ChatGPT’нинг фойдалилигига ишонч билдиришди. Жумладан, улардан бири сунъий интеллект воситасини “жуда фойдали” деб таърифлади. Бироқ, расмий кўрсатмаларга кўра, чатботлардан фойдаланиш қонун матнни умумлаштириш ва маъмурий вазифаларни бажариш каби асосий вазифалар билан чекланади.
Уэлс ва Англиядаги фуқаролик адлия реестрининг етакчиси Жеффри Вос сунъий интеллект тезроқ ва яхшироқ рақамли адлия тизимини яратиш имкониятини беришини айтди. У ишлаб чиқилган йўриқномалар судьяларга янги тизим имкониятларини тушунишга ёрдам беришини билдирди.
“Технология фақат олдинга силжийди ва суд тизими ундан фойдаланиши истисно эмас. Бироқ судьялар AI нафақат тўғри, балки ноаниқ жавобларни ҳам бериши мумкинлигини аниқ билишлари керак”, — деди Жеффри Вос.
Бу суд амалиётида сунъий интеллектни жорий этишдаги биринчи қадам бўлиб, адвокатлик фирмалари уни қўллаб-қувватламоқда. Бироқ мутахассислар ChatGPT’дан масъулиятли фойдаланиш зарурлиги ҳақида огоҳлантиради.
Ҳуқуқ жамияти президенти Ник Эммерсон сунъий интеллектдан фойдаланиш орқали суд қарорларини такомиллаштириш потенциал ини эътироф этади. Аммо у судьялар суд ихтиёрида асосий рол ўйнаши, автоматик тарзда яратилган жавоблар ва инсон томонидан қабул қилинган қарорларни ажрата олиш кераклигини таъкидлайди.
Изоҳ (0)