Тошкентда гиёҳванд моддалар ва кучли таъсир қилувчи дориларни ноқонуний сақлаётганлар ушланди

Тошкент шаҳрида гиёҳвандлик моддалари ва кучли таъсир қилувчи дориларни ноқонуний сақлаётганлар ушланди, деб хабар бермоқда ИИББ ахборот хизмати.

Қайд этилишича, пойтахтда амалга оширилаётган тезкор-профилактик тадбирларнинг “Долзарб қирқ кунлиги” давомида пойтахт ИИББ ва бошқа ҳуқуқни муҳофаза қилувчи органлар билан ҳамкорликда гиёҳвандлик воситалари ва кучли таъсир қилувчи дори воситаларини ноқонуний муомаласига чек қўйилди.

Жорий йилнинг 6 декабрь куни Мирзо Улуғбек туманида 2001 йилда туғилган Мухаммадиев Шарифжон Шухрат ўғли бошқарувидаги Spark холислар иштирокида текширилганда 173 дона “Регапен” номли ҳамда 160 дона “Аминометил” номли кучли таъсир қилувчи дори воситалари борлиги аниқланиб, ашёвий далил сифатида расмийлаштириб олинди.

Шу куни Учтепа туманида 1994 йилда туғилган Абдукаюмов Хусниддин Шамсиддинович бошқарувидаги Nexia-3 тўхтатилиб, холислар иштирокида текширилганда автомашина салонидан 32 дона “Тропикамид” номли кучли таъсир қилувчи дори воситалари борлиги аниқланди ва ашёвий далил сифатида расмийлаштириб олинди.

Шунингдек, Чилонзор туманида яшовчи 1984 йилда туғилган Бахматов Павел Игоревичнинг хонадони холислар иштирокида текширилганда 150 грамм синтетик гиёҳвандлик воситаси, электрон тарози, қадоқлашга мўлжалланган пакетлар ҳамда гиёҳвандлик воситаларини истеъмол қилишга мўлжалланган турли воситалар аниқланиб, ашёвий далил сифатида расмийлаштириб олинди.

8 декабрь куни Бектемир туманидаги “Шарқ” ЙПХ масканида 1982 йилда туғилган Уринбаев Икромиддин Мухамадалиевич бошқарувидаги Cobalt тўхтатилиб, холислар иштирокида текширилганда 8 грамм гашиш гиёҳвандлик воситаси аниқланиб, ашёвий далил сифатида расмийлаштириб олинди.

9 декабрь куни Учтепа туманида 1996 йилда туғилган Юнусов Темур Тимурович тўхтатилиб, холислар иштирокида текширилганда ёнидан 19 дона бўлакларга қадоқланган синтетик гиёҳвандлик воситалари борлиги аниқланиб, ашёвий далил сифатида расмийлаштириб олинди.

Барча ҳолатлар юзасидан тўпланган ҳужжатлар ўрнатилган тартибда кўриб чиқилиши учун тергов бўлимига тақдим этилган. Тергов якуни бўйича қонуний қарор қабул қилиниши таъминланади.