Қашқадарёдаги метан заправкалар фаолиятига ҳам 8 декабрдан чеклов ўрнатилди. Бу ҳақда вилоят ҳокимлиги ахборот хизмати раҳбари хабар берди.
Маълум қилинишича, ҳаво ҳароратининг кескин совиб кетиши туфайли табиий газни биринчи навбатда аҳоли хонадонлари, электр энергияси ишлаб чиқарувчи корхоналар ҳамда ижтимоий соҳа объектларига етказиб бериш чоралари кўрилмоқда.
Юқоридагилардан келиб чиқиб, вилоятдаги мавжуд автомобилларга газ тўлдириш компрессор шохобчаларига табиий газни етказиб бериш 8 декабрдан соат 06:00 дан соат 15:00 га қадар белгиланди.
Бундан аввал Андижон, Сурхондарё вилоятлари ва Қорақалпоғистондаги метан заправкалар фаолиятига чеклов ўрнатилганди. Биринчи навбатда аҳоли, шифохона, мактаб ҳамда мактабгача таълим ташкилоти каби аҳамиятга эга муассасаларнинг табиий газ таъминоти барқарорлигини таъминлаш мақсад қилинган.
“Дарё” журналистининг кузатувларига кўра, Тошкентдаги метан заправкаларда ҳам турнақатор навбатлар юзага келган бўлиб, тадбиркорларга куннинг маълум қисмида ишлашга рухсат берилган. Аксарият заправкалар соат 15:00 дан кейин, айримлари 17:00 дан кейин фаолият юритмаяпти. Бироқ ҳозирча масъуллар бу ҳолатни изоҳламаган.
Изоҳ (0)