Россия Марказий сайлов комиссияси мамлакатда 2024 йилги президент сайловини уч кун давомида: 15—17 март кунлари ўтказиш тўғрисида қарор қабул қилди.
Марказий сайлов комиссиясининг 13 аъзоси қарорни “ёқлаб”, бир киши “қарши” овоз берди, деб маълум қилди МСК раҳбари Элла Памфилова.
“Уч кунлик овоз бериш бизнинг сайлов тизимимиз учун аллақачон анъанага айланган. У дастлаб сайловчилар хавфсизлигини таъминлаш учун пандемия даврида қўлланган, бироқ вақт ўтиши билан бу формат ўзининг бошқа афзалликлари туфайли кўпчилик сайловчиларга манзур бўлди”, — деди Памфилова.
Украина билан чегарадош Белгород, Брянск ва Курск вилоятларида ҳамда Украинанинг аннексия қилинган ҳудудларида Марказий сайлов комиссияси иккита “қўшимча овоз бериш формати”ни қўлламоқчи. Памфилованинг сўзларига кўра, форматлардан бири бу маҳаллаларда ва сайлов участкаларидан ташқари бошқа жойларда овоз беришдир. Иккинчиси – “аҳоли пунктларида ва сайлов учун бинолар мавжуд бўлмаган, транспорт алоқаси қийин жойларда яшовчи сайловчилар томонидан овоз бериш”, деди Марказий сайлов комиссияси раҳбари.
Шу билан бирга, Памфилованинг таъкидлашича, “Россия Федерациясининг қайта бирлаштирилган субъектлари”да овоз бериш “қанчалик мақсадга мувофиқ ва мумкин” экани ҳали ҳал қилинмаган, тегишли қарор 12 декабргача қабул қилиниши керак.
7 декабрь куни Федерация кенгаши навбатдаги президентлик сайловини 2024 йил 17 мартга белгилади. Россиянинг амалдаги президенти Владимир Путин яна ўз номзодини қўйиш нияти ҳақида ҳали расман маълум қилгани йўқ.
Мухолифат, кузатувчилар ва сайлов комиссияси аъзоларининг танқидига қарамай, Россияда 2020 йилнинг июль ойида сайлов ва референдумларда уч кун ичида овоз беришга рухсат берувчи қонун қабул қилинган эди. 2021 йил сентябрь ойида Давлат Думасининг янги чақириғи сайловлари учун, 2022 йил сентябрда эса минтақавий ва маҳаллий сайловлар учун уч кунлик овоз бериш муддати ўтказилди.
Изоҳ (0)