“Вазирлар Маҳкамасининг 2021 йил 22 сентябрдаги 595-сон қарори билан тасдиқланган Қўшилган қиймат солиғи тўловчиларини солиқ органларида қўшилган қиймат солиғи бўйича махсус рўйхатдан ўтказиш тартиби тўғрисидаги низомга ўзгартириш киритиш ҳақида”ги ҳукумат қарори қабул қилинди.
.jpg)
Ҳужжатга кўра, солиқ органи ҚҚС гувоҳномасини фақатгина амалга оширилаётган битимлар (операциялар) харид қилинаётган ва реализация қилинаётган товарлар (хизматлар) номенклатурасига мос келмагандагина тўхтатиб туриши мумкин.
Маълумот учун, ҚҚС гувоҳномаси — ҚҚС тўловчисига солиқ органи томонидан бериладиган махсус рўйхатдан ўтказилганлиги ва солиқ қонунчилиги ҳужжатларида белгиланган ҳолларда ҚҚС ҳисобга олиш ҳуқуқини тасдиқловчи электрон шаклдаги ҳужжат.
Бунда гувоҳнома 30 кун муддатда тўхтатиб турилади. Ушбу муддатда камерал ҳамда сайёр солиқ текширувлари натижасига кўра ушбу ҳолатлар ўз тасдиғини топмаганда, гувоҳноманинг амал қилиши қайта тикланади.
Илгари солиқ органлари гувоҳноманинг амал қилишини қуйидаги ҳолатларда тўхтатиб туриш ваколатига эга бўлган:
- солиқ қарзи мавжуд бўлганда;
- солиқ хавфининг юқори даражасига эга солиқ тўловчилар гуруҳига мансуб бўлганда;
- ҳамда 3 ойдан ортиқ вақт давомида молия-хўжалик фаолияти амалга оширилмаганда.
Ҳужжат Қонун ҳужжатлари маълумотлари миллий базасида эълон қилинган ва 2023 йил 5 декабрдан кучга кирди.
Ноябрь ўрталарида давлат корхоналари ҳамда ўз устав фондида (устав капиталида) давлат улуши 50 фоиз ва ундан ортиқ бўлган юридик шахслар томонидан сотиб олинадиган товарларни (хизматларни) реализация қилишга доир айланмани 2028 йил 1 январга қадар ҚҚСдан озод қилиш назарда тутилаётгани тўғрисида хабар берилганди.
Изоҳ (0)