АҚШ ҳарбий-саноат мажмуасининг имкониятлари мамлакат эҳтиёжларини қондириш учун етмай қолиши мумкин, чунки Вашингтон ўзининг хорижий иттифоқчиларини фаол равишда қурол-яроғ билан таъминламоқда. Бу ҳақда Bloomberg агентлиги хабар қилди.
“Қўшма Штатлар бутун дунё бўйлаб ўз иттифоқчиларига қурол-яроғ сотмоқда, қарзга бермода, совға қилмоқда, бу орқали ўзидаги ўқ-дорилар, артиллерия снарядлари ва уруш ҳолатида керак бўлиши мумкин бўлган бошқа қуролларни камайтиряпти”, — дейилади нашрда.
Bloomberg агентлигига кўра, АҚШ ҳарбий-саноат мажмуаси мамлакат эҳтиёжлари учун зарур бўлган ўқ-дориларни ишлаб чиқара олмаслиги мумкин.
“Пентагон барча кутилмаган вазиятларни ҳисобга олиши ва уларга тайёр бўлиши керак. Душманлар АҚШда содир бўлаётган воқеаларни кузатмоқда ва улар АҚШнинг мудофаасидаги заиф томонлари ёки қуролларнинг етишмаслигидан фойдаланиши мумкин деган хавотир бор”, — дейди агентлик эксперти Кортни Макбрайд.
Агентликнинг таъкидлашича, АҚШда артиллерия снарядларини тайёрлаш учун зарур бўлган порох ишлаб чиқарадиган фақат битта завод ўз фаолиятини давом эттирмоқда. Бу факт мамлакатнинг “ўз ишлаб чиқариш базасини йирик давлатлар ўртасидаги қарама-қаршилик даври воқелигига мослаштира олмаслигига” мисол бўла олади, дея хулоса қилади Bloomberg.
Изоҳ (0)