Дания парламенти диний матнларни ёқишни тақиқловчи қонунни қабул қилди ва шу орқали Қуръонни ёқишни тақиқлади. Бу ҳақда “РИА Новости” хабар берди.
Диний матнларни ёқиш учун жавобгарлик белгиланади, жумладан, бундай ҳаракатлар учун икки йилгача озодликдан маҳрум қилиш жазоси берилади.
Қонунни парламентда 94 киши ёқлаган, 77 киши қарши овоз берган. Дания ҳукумати октябрь ойи охирида Қуръоннинг ёқиб юборилиши туфайли террорчилик хавфи кучайган бир пайтда диний китоблар ёқилишига қарши қонун лойиҳасини тақдим этганди.
Қуръоннинг ёқиб юборилишига оид ҳолатлар
- Январь ойида Стокгольмдаги Туркия элчихонаси олдида Қуръон ёқиб юборилганди. Акцияни ултраўнг ва исломга қарши “Қаттиқ курс” партиясининг даниялик-швед фаоли Расмус Палудан бошқарган.
- Апрель ойида Швеция маъмурий суди мамлакат Ташқи ишлар вазирлиги томонидан Қуръон ёқиб юборилган намойишларга қўйилган тақиқни бекор қилган. Суд ўз қарорида йиғилишлар ва намойишлар ўтказиш эркинлиги конституциявий ҳимояланган ҳуқуқлар эканини келтирган.
- Июнь ойида ироқлик муҳожир Стокгольмдаги бош масжид ёнида Қуръонни ёқиб юборган.
- Июль ойида Швеция полицияси Стокгольмдаги Ироқ элчихонаси олдида Қуръон ва Ироқ байроғи ёқиб юборилган норозилик намойишини ўтказишга рухсат берган. Шундан сўнг юзлаб одамлар Швециянинг Бағдоддаги элчихонасига бостириб кириб, бинога ўт қўйган.
- Намойишчиларни тарқатиш учун Ироқ полицияси сув пуркагичлардан фойдаланган. Ироқ мамлакатдан Швеция элчисини ҳайдаган ва яна муқаддас китоб ёқиб юборилса, дипломатик алоқаларни узишини билдирган. Шундан сўнг Ироқнинг Даниядаги элчихонаси олдида Қуръон ёқиб юборилган. Намойишчилар буни Швециянинг Бағдоддаги элчихонасига яқинда уюштирилган ҳужумга норозилик сифатида амалга оширганини айтган.
- Август ойи бошида Стокгольмда эронлик аёл полиция ҳимоясида Маларен кўли қирғоғида мангалда Қуръонни ёқиб юборган. У “барча динларни йўқ қилиш” кераклигини айтган.
- Август ойи ўрталарида Швециянинг Стокгольм шаҳрида полиция ҳимояси остида яна муқаддас Қуръон китоби ёқиб юборилди. Бунинг олдини олишга уринган эркак эса ҳибсга олинди. Намойишга ироқлик муҳожирлар бошчилик қилган. Улар аввал Қуръон нусхасини тепиб, устига сакраган, кейин эса уни бутунлай ёқиб юборган.
Изоҳ (0)