Андижон вилояти ҳудудида “Долзарб 40 кунлик” махсус профилактик тадбирлари доирасида бир қатор жиноят олами вакиллари, ўзидан “етакчи” ясаб олганлар ҳамда уларга яқин бўлган шахслар ушланмоқда. Бу ҳақда вилоят ИИБ ахборот хизмати хабар берди.
Хусусан, 5 декабрь куни ўтказилган тезкор-қидирув тадбирлари давомида Андижон шаҳрида яшовчи муқаддам Жиноят кодексининг 104, 277-моддаларида назарда тутилган жиноятларни содир этгани учун судланган қуйидаги шахслар қўлга олинган:
- Андрей Киселов (1988 йилда туғилган ),
- Фаррух Шодибоев (Андижон шаҳрида яшовчи 1989 йилда туғилган),
- Бахтиёр Эргашев (Хўжаобод туманида яшовчи 1973 йилда туғилган),
- Алишер Парпиев (1985 йилда туғилган).
Улар вилоят ҳудудида оилавий зўравонлик, майда безорилик, валюта бойликларини қонунга хилоф равишда олиш ёки ўтказиш билан боғлиқ ҳуқуқбузарликларни содир этгани аниқланиб, уларнинг ҳар бирига нисбатан маъмурий қамоқ жазоси қўлланилган.
Ҳозирда уларнинг содир этилган оғир ва ўта оғир турдаги жиноятларга алоқадорлиги ўрганилмоқда.
“Ҳурматли фуқаролар! Агар сизлар ушбу шахслардан жабр кўрган бўлсангиз ёки ушбу шахсларнинг жиноий хатти-ҳаракатлари тўғрисида маълумотларга эга бўлсангиз, Андижон вилояти ИИБнинг “102” рақами ёки 97-432-10-20 телефон рақамига мурожаат қилишингизни сўраймиз. Мурожаат қилган фуқаро шахсининг сир сақланиши кафолатланади”, — дейилади хабарда.
Аввалроқ Андижондаги махсус профилактик тадбирлар доирасида жиноят олами вакили бўлган уч киши ушлангани тўғрисида хабар берилганди. Шунингдек, Наманган вилояти ҳудудида тезкор-профилактик тадбирларнинг “Долзарб 40 кунлиги” доирасида тергов ва суд органларидан яшириниб юрган 35 нафар шахс ушланган эди.
Изоҳ (0)