Дубайда COP28 форуми доирасида Экология, атроф-муҳитни муҳофаза қилиш ва иқлим ўзгариши вазирлиги ҳамда Таdwееr (Аbu Dabi Waste Management Company — Абу-Даби чиқиндиларни бошқариш компанияси) ўртасида меморандум имзоланди, деб хабар бермоқда вазирлик ахборот хизмати.
Меморандумдан сўнг Шавкат Мирзиёев ва Таdwееr компанияси бош директори Али ал-Дҳаҳери ўртасида икки томонлама учрашув бўлиб ўтган. Учрашувда 2019 йилдан буён йўлга қўйилган ҳамкорликнинг кенгайиши БАА ва Ўзбекистон ўртасидаги мустаҳкам ва ижобий муносабатлардан далолат бериши қайд этилган. Шунингдек, меморандум имзоланиши ҳамкорликнинг янги босқичга кўтарилганини ифодалаши таъкидланган.
Таъкидланишича, меморандум қаттиқ маиший чиқиндиларни бошқаришда замонавий, инновацион ва экологик тоза технологиялар ҳамда хизматларни жорий этиш ҳамда барқарорликни оширишга хизмат қилади. Шунингдек, Ўзбекистонда “Чиқиндиларни энергияга айлантириш” заводи ишга туширилиши ҳам режалаштирилган.
“Ўзбекистонда чиқиндиларни бошқариш соҳасини такомиллаштиришга катта эътибор қаратилмоқда. Таdwееr компанияси билан имзоланган меморандум эса бу борада навбатдаги самарали қадам ҳисобланади. Таdwееr чиқиндиларни бошқариш соҳасида катта тажрибага эга. Биз ўзаро ҳамкорликда чиқиндиларни қайта ишлаш инфратузилмасини ривожлантириш, қаттиқ маиший чиқиндиларни йиғиш ва олиб кетиш, саралаш, қайта ишлаш, утилизация қилиш, чиқинди газини йиғиш, электр ва иссиқлик энергиясини ишлаб чиқаришни бошқариш тизимини такомиллаштириш каби муҳим вазифаларни олдимизга мақсад қилиб қўйганмиз. Ҳамкорлигимиз ҳар томонлама манфаатли бўлишига ишонаман”, — деди экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов.
Лойиҳа Навоий, Бухоро вилоятлари ва Фарғона водийсига қаратилган техник-иқтисодий асослашдан бошланади, ҳар бир ҳудудда чиқиндиларни йўқ қилиш амалиёти ўрганилади. Таdwееr компаниясининг бошқарувчи директори ва бош директори Али ал-Дҳаҳери ҳамкорликдан мамнун эканлигини билдирди.
“Биз глобал миқёсда экологик барқарорликни қўллаб-қувватлашга эътибор қаратганмиз. Ўзбекистон Республикаси Экология, атроф-муҳитни муҳофаза қилиш ва иқлим ўзгаришлари вазирлиги билан ҳамкорлигимиз эса инновациялар ва экологик тоза ечимлар борасидаги позициямиз мустаҳкам эканлигини исботлайди. Ўзбекистонда “Чиқиндиларни энергияга айлантириш” заводининг ишга туширилиши ҳамкорликнинг аҳамияти ва бизнинг янада яшил, барқарор келажакка садоқатимиздан далолатдир. Бу ташаббус Ўзбекистонда нафақат қаттиқ маиший чиқиндиларни бошқариш соҳасида инқилоб ясайди, балки иқлим ўзгариши таъсирини юмшатишга ҳам катта ҳисса қўшади. Энг илғор технологиялар ва чиқиндиларни энергияга айлантириш бўйича стратегик ташаббуслар орқали биз атроф-муҳитни муҳофаза қилишда янги мезонларни белгилашга тайёрмиз”, — деди у.
Ҳамкорлик доирасида маиший чиқиндиларни йиғиш ва олиб чиқиш, шунингдек, саралаш, қайта ишлаш ва утилизация қилишни бошқариш тизими ишлаб чиқилади. Бундан ташқари, электр ва иссиқлик энергияси ишлаб чиқариш учун полигон газини қазиб олишга ҳам эътибор қаратилади. Лойиҳа доирасида қаттиқ маиший чиқиндиларни ишлаб чиқарувчи корхоналарда чиқиндиларни саралаш линиялари ўрнатиш, пластмасса, қоғоз, шиша ва алюминий каби иккиламчи хом ашёни қайта ишлаш корхоналарини ташкил этиш ҳам кўзда тутилган.
Тадқиқотлар шуни кўрсатадики, чиқиндилар ва ресурсларни фаол бошқариш глобал иссиқхона газлари чиқиндиларининг таъсирини 15 –20 фоизга камайтиради, бу эса атроф-муҳит ва иқтисодий жиҳатдан сезиларли афзалликларга олиб келади.
Изоҳ (0)