Ўзбекистонда аҳоли учун етказиб берилаётган кўмир қиймати қанча?

Ўзбекистонда аҳолига мўлжалланган кўмирнинг 73 фоизи етказиб берилди. Бу ҳақда “Ўзбеккўмир” АЖ ахборот хизмати хабар берди.

Маълум қилинишича, 2023—2024 йиллар куз-қиш мавсуми учун республика аҳолиси ва бюджет ташкилотларига жами 1 773,1 минг тонна, шундан аҳолига 1 190,1 минг тонна, бюджет ташкилотлари учун жами 582,9 минг тонна (ДХШ асосида тадбиркорлик субъектларига 234,8 минг тонна) маҳаллий кўмир етказиб берилиши белгиланган. 

“Кўмир таъминот” МЧЖ тезкор маълумотларига кўра, бугунги кун ҳолатига аҳолига 862,8 минг тонна (73 фоиз), бюджет ташкилотларига жами 562,1 минг тонна (96 фоиз), шундан тўғридан тўғри бюджет ташкилотларига 344,3 минг тонна (99 фоиз), давлат хусусий шериклик (ДХШ) асосида иситиш тизимларини бошқариш учун жалб қилинган тадбиркорлик субъектларига 217,8 минг тонна (95 фоиз) маҳаллий кўмир етказиб берилди. 

Бугунги кунда аҳоли учун 1 тонна кўмир 309 800 сўмдан, бюджет ташкилотлари учун 1 тонна кўмир 431 400 сўмдан реализация қилинмоқда.  

Кўмир маҳсулотлари ҳудудлардаги МФЙлар томонидан шакллантирилган ҳамда маҳаллий ҳокимликлар томонидан тасдиқлаган рўйхатга асосан “Кўмир таъминот” МЧЖнинг республикадаги жами 90 та ҳудудий омборлари ва 13 та шохобчаси орқали тарқатилмоқда.

Маълумот учун: “Кўмир таъминот” МЧЖнинг республика ҳудудларидаги кўмир омборларида 62,5 минг тонна маҳаллий кўмир жамғарилиб, 28,2 минг тоннаси йўлда ортиб юборилган.