O‘zbekistonda aholi uchun yetkazib berilayotgan ko‘mir qiymati qancha?

O‘zbekistonda aholiga mo‘ljallangan ko‘mirning 73 foizi yetkazib berildi. Bu haqda “O‘zbekko‘mir” AJ axborot xizmati xabar berdi.

Ma’lum qilinishicha, 2023—2024-yillar kuz-qish mavsumi uchun respublika aholisi va budjet tashkilotlariga jami 1 773,1 ming tonna, shundan aholiga 1 190,1 ming tonna, budjet tashkilotlari uchun jami 582,9 ming tonna (DXSH asosida tadbirkorlik subyektlariga 234,8 ming tonna) mahalliy ko‘mir yetkazib berilishi belgilangan. 

“Ko‘mir taʼminot” MCHJ tezkor maʼlumotlariga ko‘ra, bugungi kun holatiga aholiga 862,8 ming tonna (73 foiz), budjet tashkilotlariga jami 562,1 ming tonna (96 foiz), shundan to‘g‘ridan to‘g‘ri budjet tashkilotlariga 344,3 ming tonna (99 foiz), davlat xususiy sheriklik (DXSH) asosida isitish tizimlarini boshqarish uchun jalb qilingan tadbirkorlik subyektlariga 217,8 ming tonna (95 foiz) mahalliy ko‘mir yetkazib berildi. 

Bugungi kunda aholi uchun 1 tonna ko‘mir 309 800 so‘mdan, budjet tashkilotlari uchun 1 tonna ko‘mir 431 400 so‘mdan realizatsiya qilinmoqda.  

Ko‘mir mahsulotlari hududlardagi MFYlar tomonidan shakllantirilgan hamda mahalliy hokimliklar tomonidan tasdiqlagan ro‘yxatga asosan “Ko‘mir taʼminot” MCHJning respublikadagi jami 90 ta hududiy omborlari va 13 ta shoxobchasi orqali tarqatilmoqda.

Maʼlumot uchun: “Ko‘mir taʼminot” MCHJning respublika hududlaridagi ko‘mir omborlarida 62,5 ming tonna mahalliy ko‘mir jamg‘arilib, 28,2 ming tonnasi yo‘lda ortib yuborilgan.