Маколей Калкин Голливуддаги Шон-шараф хиёбонида ўз юлдузига эга бўлди (видео)

43 ёшли Голливуд актёри Маколей Калкин Голливуддаги Шон-шараф хиёбонида ўз юлдузига эга бўлди, деб ёзади “Правила жизни”. 

Мазкур хиёбонда санъатнинг юксалишига ўз ҳиссасини қўшган, кино ва мусиқа соҳасида муваффақиятга эришган кишилар шарафига “юлдузлар” тақдим этилади.

“Уйда ёлғиз” фильми қаҳрамони Калкин тадбирда таъсирли нутқ сўзлаб, кўз ёшларини тия олмади.

“Шон-шараф хиёбони қўмитасига мени бундай шараф билан тақдирлагани учун раҳмат айтаман. Менга бўлган ҳурматни ҳис қилдим. Бу жойда мен яхши кўрадиган жуда кўп инсонлар бор ва уларнинг ҳам сизга шундай туйғуда бўлишини ҳис қилиш ажойиб”,— дейди Калкин.

Маросимда актёрни табриклаш учун “Уйда ёлғиз” фильмида Кевиннинг онаси ролини ижро этган 69 ёшли актриса Кэтрин O’Ҳара ҳам бевосита қатнашди.

Кэтрин O’Ҳара “Уйда ёлғиз” фильмини эслар экан: “Мен фильм учун катта куч сарфлаганингизни биламан ва ўша пайтдаги сизнинг актёрлик маҳоратингиз дунёдаги энг табиий нарсалардан бири эди”, — дейди.

Шунингдек, актриса картинанинг муваффақиятини ва ёш Калкиннинг катта шуҳратини эслатди. Актрисанинг сўзларига кўра, ундаги юмор ҳисси ва ақл-заковат унга бир хил қолишга ёрдам берган.

“Бир эмас, икки марта ёлғиз қолдирган экрандаги онангизни ушбу қувончли воқеани баҳам кўришга таклиф қилганингиз учун ташаккур. Мен сиз билан фахрланаман”, — дея сўзларини якунлади актриса.

Маълумот учун, Калкин ўзининг актёрлик фаолиятини 4 ёшида бошлаган. Унга “Уйда ёлғиз” фильмида Кевин Маккаллистер роли катта машҳурлик олиб келган. Шунингдек, “Менинг қизалоғим”, “Бак тоға” “Бойвачча Рич” ва бошқа фильмларда қатнашган. Сўнгги йилларда актёр “Американча даҳшатли ҳикоя” сериалининг сўнгги мавсуми ва “Энтергалактик” мультсериалида суратга тушди.