43 yoshli Gollivud aktyori Makoley Kalkin Gollivuddagi Shon-sharaf xiyobonida o‘z yulduziga ega bo‘ldi, deb yozadi “Pravila jizni”.
Mazkur xiyobonda sanʼatning yuksalishiga o‘z hissasini qo‘shgan, kino va musiqa sohasida muvaffaqiyatga erishgan kishilar sharafiga “yulduzlar” taqdim etiladi.
“Uyda yolg‘iz” filmi qahramoni Kalkin tadbirda taʼsirli nutq so‘zlab, ko‘z yoshlarini tiya olmadi.
“Shon-sharaf xiyoboni qo‘mitasiga meni bunday sharaf bilan taqdirlagani uchun rahmat aytaman. Menga bo‘lgan hurmatni his qildim. Bu joyda men yaxshi ko‘radigan juda ko‘p insonlar bor va ularning ham sizga shunday tuyg‘uda bo‘lishini his qilish ajoyib”,— deydi Kalkin.
Marosimda aktyorni tabriklash uchun “Uyda yolg‘iz” filmida Kevinning onasi rolini ijro etgan 69 yoshli aktrisa Ketrin O’Hara ham bevosita qatnashdi.
Ketrin O’Hara “Uyda yolg‘iz” filmini eslar ekan: “Men film uchun katta kuch sarflaganingizni bilaman va o‘sha paytdagi sizning aktyorlik mahoratingiz dunyodagi eng tabiiy narsalardan biri edi”, — deydi.
Shuningdek, aktrisa kartinaning muvaffaqiyatini va yosh Kalkinning katta shuhratini eslatdi. Aktrisaning so‘zlariga ko‘ra, undagi yumor hissi va aql-zakovat unga bir xil qolishga yordam bergan.
“Bir emas, ikki marta yolg‘iz qoldirgan ekrandagi onangizni ushbu quvonchli voqeani baham ko‘rishga taklif qilganingiz uchun tashakkur. Men siz bilan faxrlanaman”, — deya so‘zlarini yakunladi aktrisa.
Maʼlumot uchun, Kalkin o‘zining aktyorlik faoliyatini 4 yoshida boshlagan. Unga “Uyda yolg‘iz” filmida Kevin Makkallister roli katta mashhurlik olib kelgan. Shuningdek, “Mening qizalog‘im”, “Bak tog‘a” “Boyvachcha Rich” va boshqa filmlarda qatnashgan. So‘nggi yillarda aktyor “Amerikancha dahshatli hikoya” serialining so‘nggi mavsumi va “Entergalaktik” multserialida suratga tushdi.
Izoh (0)