Оқ уй Конгрессга 2023 йил охиригача Украинага ёрдам бериш учун ажратиладиган ресурслар тугашини маълум қилганди. АҚШнинг собиқ миллий хавфсизлик маслаҳатчиси Жон Болтон қандай ҳолатда ёрдам давом этишини айтди. Бу ҳақда Тҳе Hill хабар берди.
Болтоннинг сўзларига кўра, Украинага ёрдам иммиграция ислоҳоти билан боғлиқ бўлиб, республикачилар талабларини қондиради. Украинага ёрдам “бир нечта бошқа вариантлар” билан боғлиқ бўлади.
“Менимча, республикачилар томонида ҳамма буни иммиграция сиёсатимиздаги қандайдир ислоҳот билан боғлашни хоҳлайди... шундай экан, бу амалга ошади деб ўйлайман”, — деди у.
Болтон Конгрессни Украинага 61 миллиард доллар миқдоридаги маблағни тақдим этишга чақирганини айтди. У Оқ уйнинг бошқарув ва бюджет бўйича директори Шаланда Янгнинг Украинага ёрдам тугаётгани ҳақида баёнотини “ажиотаж” деб атади.
“Менимча, бюджет директорининг баёнотида бир оз муболаға бор, лекин жиддий сиёсат нуқтаи назаридан, Конгресс бу борада ҳаракат қилиши кераклигига шубҳа йўқ. Умид қиламанки, бу улар Рождество учун уйга қайтишларидан олдин содир бўлади”, — деди Жон Болтон.
Аввалроқ АҚШнинг бошқарув ва бюджет бюроси директори Конгрессга Украинага ёрдам кўрсатишда “пул ва вақт ҳам йўқ”лигини таъкидлаган эди. Конгресс маблағни маъқулламаса, Киевга қурол етказиб бериш тўхташи мумкин. Украина президенти Владимир Зеленский бугун (5 декабрь) ҳарбий ёрдам бўйича АҚШ сенаторларига мурожаат қилиши кутилмоқда.
Изоҳ (0)