АҚШ ҳукумати Украинага узоқ масофали GLSDB (Ground Launched Small Diameter Bomb) ракеталарини етказиб беришни кечиктирди, деб хабар бермоқда Reuters.
Агентлик манбаларига кўра, бош пудратчи Boeing ракеталарни 2023 йил декабрь ойида АҚШга топширади, шундан сўнг улар Украинага жўнатилишидан олдин бир неча ой синовдан ўтказилади. Пентагон вакилининг айтишича, АҚШ ракеталарни “муваффақиятли текширувлардан сўнг” 2024 йил бошида Киевга топширишни кутмоқда.
Boeing 2022 йилнинг кузида АҚШга GLSDB ракеталарини сотиб олиб, Украинага жўнатишни таклиф қилганди. Энг оптимистик прогнозга кўра, етказиб бериш 2023 йилнинг баҳорига режалаштирилган. Февраль ойида Politico ракеталарни топшириш “2023 йил охирида” кутилаётгани ҳақида хабар берди.
GLSDB ракеталари Boeing ва Saab Group компаниялари томонидан ишлаб чиқарилади. Ракета учиш масофаси 150 километрни ташкил қилади. GLSDB ракеталари Украина армиясида хизмат қилаётган ҲИМАРС қурилмаларидан ҳам учирилиши мумкин.
2023 йилнинг март ойидан бери Россия Мудофаа вазирлиги GLSDB ракеталарини камида тўрт марта, охирги сафар 26 октябрда тутиб олгани ҳақида хабар берди. Reuters манбалари эса Қўшма Штатлар Украинага ҳали бирорта ҳам “ақлли бомба” етказиб бермаганини таъкидлайди. Украина бу қуролларни бошқа давлатлардан олганми ёки йўқлиги номаълум.
Изоҳ (0)