Европа Иттифоқи Фаластин давлатини тан олиши керак, чунки бу Исроил-Фаластин можаросига барҳам бериш ва минтақани “барқарорлаштириш”га ёрдам беради. Бу ҳақда Испания бош вазири Педро Санчесга таяниб, Al-Arabiya хабар берди.
“Биз бу инқирозга чек қўйиш учун сиёсий ечим топишимиз керак, бундаги ечим, менинг фикримча, Фаластин давлатининг тан олинишини талаб қилади. Ушбу масалани ҳал қилиш Европа манфаати йўлидадир, чунки Ғазо секторида кўраётганларимизни қабул қилиб бўлмайди, шунингдек, бу минтақани барқарорлаштирувчи геосиёсий мақсаддир”, — деди Испания бош вазири.
Санчес ташқи сиёсатдаги устувор вазифа “Европа ва Испанияда Фаластин давлатини тан олиш учун ишлаш” эканини айтган. Агар Европа Иттифоқига аъзо 27 давлат ўртасида консенсус бўлмаса, Санчес Мадрид Фаластин давлатини бир томонлама тан олишни истисно қилмаслигини билдирди.
Испания парламенти 2014 йилда Фаластинни давлат сифатида тан олишга чақирувчи резолюцияни ёқлаб овоз берганди. Бироқ овоз бериш мажбурий эмас эди ва ҳеч қандай кузатув бўлмаган.
“Вазият ўзгарди”, — деди Санчес ва араб давлатлари Европа Иттифоқининг позициясини тушунмаётганини айтди.
“Йиллар давомида биз Исроил қандай қилиб Фаластин ҳудудини мунтазам равишда босиб олганини кўрдик”, — дея қўшимча қилди у Исроилнинг турар жой қурилишига ишора қилиб.
Халқаро Амнистия ташкилотига кўра: “Исроилнинг тинч аҳолини босиб олинган Фаластин ҳудудига жойлаштириш ва маҳаллий аҳолини кўчириш сиёсати халқаро гуманитар ҳуқуқнинг асосий қоидаларига зиддир”.
Исроил Мадридни “терроризмни” қўллаб-қувватлашда айблади.
“Дўст халқлар ҳақиқатни айтиши керак. Аммо биз Исроилга ҳам халқаро ҳуқуқни ҳурмат қилишини айтишимиз керак”, — деди Санчес.
Изоҳ (0)