Польша шимоли-шарқида жойлашган Августов шаҳри яқинида сапёрлар батальони ташкил этилади, унинг асосий вазифаси шарқий чегарани мустаҳкамлаш ва Сувалки йўлаги хавфсизлигини таъминлашдан иборат бўлади, деди Польша мудофаа вазири Мариуш Блашак. Унинг сўзлари Польша ҳукумати сайтида келтирилган.
Мудофаа вазирлиги раҳбарининг сўзларига кўра, сапёрлар батальони 2023 йил охиригача яратилади.
“Августовдаги бўлинма 2022 йилда Вазирлар Кенгаши томонидан қабул қилинган 2023—2025 йилларга мўлжалланган Польша Қуролли кучларини мустаҳкамлаш пакети доирасида яратилади, унда НАТОнинг шарқий қанотидаги мавжуд тактик тузилмаларни мустаҳкамлаш назарда тутилган”, — дейилади вазирлик хабарида.
Сувалки йўлаги — тахминан 100 километр узунликдаги участка бўлиб, ундан Польша ва Литва ўртасидаги чегара ўтган. Ушбу участка Польшани Россия ва Беларуснинг Калининград ҳамда Гродно вилоятлари билан боғловчи “қуруқлик йўлаги” деб аталади.
“Вагнер” кучларининг Беларусга жойлаштирилиши ҳақидаги хабарлардан кейин Польша шарқий чегараларини мустаҳкамлай бошлади. Июль ойи бошида Варшава 1 000 нафар аскар ва деярли 200 та ҳарбий техникани Беларусь билан чегарадош Подляшье вилоятига жўнатишини эълон қилди.
“Вагнер” бўлинмалари эса Беларуснинг Осиповичи шаҳридан 20 километр узоқликдаги лагерга жойлаштирилди. Польша разведкаси қўшни республика ҳудудида бир неча юзлаб “вагнерчи”лар борлиги ҳақида хабар берди. Беларусда “Вагнер” инструкторлари маҳаллий ҳарбий хизматчиларни ўқитмоқда.
Изоҳ (0)