Америкалик тадбиркор, Tesla ва SpaceX асосчиси Илон Маск 2024 йилда бўлиб ўтадиган президентлик сайловларида АҚШнинг амалдаги президенти Жо Байденга овоз бермаслигини айтди. Бу ҳақда у The New York Times газетаси томонидан ташкил этилган ва CNBC телеканали орқали эфирга узатилган тадбирда маълум қилди.
Менимча, Байденга овоз бермайман, — деди тадбиркор.
АҚШ собиқ президенти Дональд Трампнинг номзодини қўллаб-қувватлашга тайёрмисиз деган саволга Маск бу “қийин танлов” деб жавоб берди.
Май ойида Маск ҳар икки сиёсатчи иштирок этган 2020 йилги президентлик сайловида Байденга овоз берганини айтганди. Ўшанда бизнесмен CNBC телеканалига берган интервьюсида Қўшма Штатлар президенти сифатида “нормал одам”ни кўришни хоҳлашини айтган.
“Ҳозир Байдендан норозимисиз?” — деган саволга Маск савол билан жавоб берди: “Биз ҳаммамиз нормал одам президент бўлишини хоҳлаймиз, шундай эмасми? Президент амалда мамлакатнинг ижрочи раҳбари бўлгани сабабли, биз учун унинг яхши ижрочи раҳбар экани муҳим”.
“Бизга шунчаки яхши раҳбар, Американинг бош директори керак”, — деб тушунтирди тадбиркор.
АҚШда президентлик сайлови 2024 йилнинг ноябрь ойида бўлиб ўтиши режалаштирилган. Трамп ҳам, Байден ҳам унда иштирок этишини эълон қилган.
Трамп АҚШда тўртта жиноий иш бўйича айбланган. Август ойи бошида у жами 561 йилга қамалиши мумкинлигини айтганди.
Изоҳ (0)