Қирғизистонда маҳкумларга электрон билагузуклар тақилиши мумкин

Қирғизистон Адлия вазирлиги маҳкумлар учун электрон билагузукларни синовдан ўтказмоқда. Бу ҳақда AKIpress хабар берди.

Тегишли қонун лойиҳаси Қирғизистон Вазирлар Маҳкамаси томонидан маъқуллангандан кейин Қирғизистон парламентига кўриб чиқиш учун таклиф қилинди. Қирғизистон Адлия вазирлиги вакилларининг таъкидлашича, агар қонун лойиҳаси парламент аъзолари томонидан маъқулланса, бу суд жараёнларининг турли жиҳатларини рақамлаштириш ва оптималлаштириш учун шароит яратади. Жумладан:

• Электрон билагузуклар амалда фаол қўлланади;
• Унча оғир бўлмаган, зўравонлик таҳдиди билан боғлиқ бўлмаган жиноятлар ва шунга ўхшаш ҳолатлар бўйича қамоқдаги маҳбуслар сони камаяди;
• Суд томонидан оқланган тақдирда, ноқонуний ушлаб туриш оқибатлари минималлаштирилади;
• Тегишли инфратузилмага босим сезиларли даражада камаяди.

Шунингдек, бундай қурилмалар маиший зўравонликка қарши курашишда, айрим шахсларнинг муайян субъектлар, шахслар ёки ҳудудларга киришини чеклашда самарали восита бўлиши қайд этилган.

Агар қонун лойиҳаси қабул қилинса, электрон билагузуклар ва шунга ўхшаш қурилмалар жиноят қонунчилиги ва “электрон кузатув” деб номланган янги профилактик чора сифатида 2024 йилдаёқ жорий этилиши мумкин.

Қирғизистоннинг амалдаги қонунчилигига кўра, гаджетлардан аллақачон судланган шахсларга нисбатан жиноий иш юритишда ҳам фойдаланиш мумкин. Май ойи бошида Қирғизистон Вазирлар Маҳкамасида расмийлар электрон билагузуклардан фойдаланган ҳолда гумонланувчиларни кузатишнинг инновацион тизимини жорий этиш масаласини муҳокама қилган. Учрашувда ушбу қурилмалар гумонланувчиларнинг жойлашуви, ҳаракати ва фаолиятини кузатишда қўлланиши таъкидланган.

Ушбу технология режимни бузиш ҳолатларини камайтириш ва ҳуқуқни муҳофаза қилиш органлари фаолияти самарадорлигини оширишга қаратилган.

Қирғизистон адлия вазири Аяз Баетовнинг таъкидлашича, электрон билагузуклар “тезкор-тергов тадбирлари доирасида гумонланувчиларни кузатишнинг мажбурий воситасига айланиши, оилавий ва гендер асосидаги зўравонлик ҳолатларини камайтиришга ёрдам беради”.

Эслатиб ўтамиз, оғир ва ўта оғир жиноят содир этганликда гумонланган шахсларга нисбатан электрон кузатув қўлланмайди.