Қашқадарё вилоятининг Чироқчи туманидаги шифохонада ўғил фарзандини дунёга келтирган 26 ёшли аёл вафот этди. Ҳолат прокуратура назоратига олинган. Бу ҳақда вилоят Соғлиқни сақлаш бошқармаси ахборот хизмати хабар берди.
Қайд этилишича, тармоқларда Чироқчи тумани тиббиёт бирлашмасининг реанимация бўлимида 26 ёшли аёл вафот этгани ҳақида хабар эълон қилинган.
Чироқчи туман “Ғаллачи” маҳалласида яшовчи 1997 йилда туғилган А.Г. шу йилнинг 10 октябрь куни соат 06:00 да қариндошлари томонидан туғуруқ бўлимига олиб келинган. Аёлда охирги кўрик 2023 йил 13 сентябрда, ҳомиладорликнинг 33-ҳафтасида ўтказилган. Шунда аёлга ётиб даволаниш тавсия қилинган, лекин аёл даволанишга бормаган. Бўлимга келганида аёлнинг умумий аҳволи қониқарли баҳоланган. 10 октябрь куни соат 16:10 да вазни 3400 оғирликдаги ўғил чақалоқни дунёга келтирган, — дейилади масъуллар изоҳида.
Қўшимча қилинишича, боласини дунёга келтирган аёл икки кун ўтгач, вафот этган.
2023 йил 12 октябрь куни эрталаб соат 5-6 лар оралиғида аёлнинг аҳволи оғирлашиб, қорнида кучли оғриқ пайдо бўлган. Оғриқлар кучайгач, бирлашма хирург врачлари жалб қилинган. Шундан сўнг вилоятдан жарроҳ, акушер-гинеколог ва нефролог чақирилган. Сўнг беморда операция ўтказилган. Операциядан кейин аёлга тегишли муолажалар қилинган. Аммо аёлнинг умумий аҳволи оғирлашган, қилинган барча муолажаларга қарамай у 2023 йил 16 октябрь куни соат 02:30 да вафот этган, — дейди масъуллар.
Қўшимча қилинишича, аёл ўлими билан боғлиқ ҳолат вилоят Соғлиқни сақлаш бошқармасида ўтказилган кенгайтирилган йиғилишида муҳокама қилинган. Ва бу борада тегишли чоралар белгиланган. Айни пайтда мазкур ҳолат Чироқчи тумани прокуратураси томонидан ўрганилмоқда.
Вилоят Соғлиқни сақлаш бошқармаси ахборот хизмати раҳбари Нуриддин Эгамов “Дарё” журналистининг “Аёл дунёга келтирган боланинг аҳволи қандай?”, деган саволига боланинг аҳволи яхши эканини айтиб, марҳум аёлнинг яқинлари олиб кетганини билдирди.
Изоҳ (0)