Наманган вилоятида жуда кўп миқдордаги этил спиртини ноқонуний муомалага киритган корхоналар аниқланди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Маълум қилинишича, ҳолат Бош прокуратура ҳузуридаги департаментнинг Наманган вилоят бошқармаси томонидан ўтказилган терговга қадар текширувларда аниқланган. “Э.Л.”, “Г.E.” ва “Э.М.” МЧЖ раҳбарлари антисептик маҳсулотини ишлаб чиқариш мақсадида биржа савдолари орқали жами 102,7 миллиард сўмлик 4 025 тонна этил спиртини харид қилиб, амалда антисептик маҳсулотларини ишлаб чиқармасдан этил спиртини бошқа шахсларга сотиб юборган.
Шу каби “А.Ф.” МЧЖ раҳбари А.А. биржа савдолари орқали харид қилинган 34,8 миллиард сўмлик 1 263 тонна этил спиртидан антисептик маҳсулоти ишлаб чиқармасдан, этил спиртини бошқа шахсларга сотиб юборгани, шунингдек ушбу маблағлар ҳисобидан Lacetti харид қилгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)