Украинада қор бўрони туфайли ўн киши ҳалок бўлди, яна 23 киши, жумладан, икки бола жароҳат олди, деб маълум қилди мамлакат ички ишлар вазири Игор Клименко.
Унинг сўзларига кўра, Одесса вилоятида кучли ёмғир ва қор билан бирга келган бўрон оқибатида беш киши ҳалок бўлди, яна 15 киши жароҳатланди. Ноқулай об-ҳаво билан боғлиқ 254 та қўнғироққа давлат фавқулодда вазиятлар хизмати бўлинмалари томонидан жавоб қайтарилди. 849 та автомашина шатакка олинди, қарийб икки ярим минг аҳолига ёрдам кўрсатилди.
Николаев вилоятида, Клименконинг сўзларига кўра, икки киши ҳалок бўлган, яна икки киши яраланган. Қутқарувчиларга 66 марта ёрдам чақируви келиб тушган. 144 та автомашина шатакка олинган.
Харьков вилояти ва Киевда яна уч киши ҳалок бўлди, олти киши яраланди, деди Украина Ички ишлар вазирлиги раҳбари, тафсилотларни ошкор қилмасдан.
Ёмон об-ҳаво оқибатларини бартараф этиш давом этмоқда. 27 ноябрь куни эрталаб Украинанинг 11 вилоятида 411 аҳоли пункти электр таъминотисиз қолди.
Украина ва Россиянинг Қора денгиз минтақаларида бўрон 26 ноябрь куни бошланган. Кучли шамол туфайли электр узатиш линиялари шикастланган, юз минглаб одамлар электрсиз қолган. Россия расмийларига кўра, аннексия қилинган Қрим ва Краснодар ўлкасида бўрон оқибатида камида тўрт киши ҳалок бўлган.
Изоҳ (0)