Украина Мудофаа вазирлигининг Бош разведка бошқармаси бошлиғи Кирилл Буданов Россия президенти Владимир Путиннинг уруш борасидаги асосий хатоси ҳақида гапирди. Бу ҳақда у “Крим.Реалии”га берган интервьюсида маълум қилди.
Буданов Путиннинг реалликдан узоқдалиги унинг асосий хатоси бўлиб, Россия учун стратегик йўқотиш эканини таъкидлади.
“Путинни ҳақиқатдан узоқлаштиришди — бу унинг асосий хатоси. Гап нотўғри ҳисоб-китобларда эмас, балки реалликдан узилганликда. Асосий хато шудир”, — деди у.
Украина разведкаси раҳбари уруш оқибатида Россия кўплаб жиддий муаммоларга дуч келгани, жумладан, дипломатик сургунга айланганини билдирди.
“Россияга қаранг: у дипломатик сургун, иқтисодиётига қаранг, доллар курсини кузатинг”, — таъкидлади Буданов.
У Кремль расмийлари аллақачон “махсус ҳарбий операция” мақсадларини тилга олишни тўхтаганини айтди.
“Уларнинг ўз фуқароларига айтадиган гаплари йўқ. Урушни қанча узоқ давом эттирсалар, бу вазиятдан чиқишлари шунчалик қийин бўлади”, — деди украиналик амалдор.
Шунингдек, Буданов Россия стратегик мағлубиятга учраган бўлса-да, жанг майдонида ҳали мағлуб бўлмаганини таъкидлади.
Дастлаб бир неча кун ичида Украинани босиб олишни режалаштирган Россия кучли қаршиликка дуч келди. 2023 йил 28 август ҳолатига кўра, рус қўшинларининг умумий йўқотишлари тахминан 261 310 кишини ташкил қилади.
АҚШ армиясининг истеъфодаги генерали, Марказий разведка бошқармаси собиқ директори Девид Петреуснинг айтишича, Россиянинг Украинага қарши уруши Ғарб давлатларининг “қизил чизиқлар”нинг бузилишига адекват жавоб бермагани билан боғлиқ бўлиши мумкин.
Унинг фикрича, Путин АҚШ ва НАТОга аъзо давлатлар Украинага бостириб киришига муносабат билдирмаслигига ишонган ва бу билан янглишган.
Изоҳ (0)