Тошкент ҳайвонот боғи сафи Африкадан олиб келинган янги ҳайвонлар билан кенгайди, деб хабар беради боғ маъмурияти.
Маълум қилинишича, пойтахт ҳайвонот боғига учта зебра, учта жирафа болалари, оқ Бенгал йўлбарси ҳамда оқ шер олиб келинган. Ушбу ҳайвонлар Жанубий Африкадаги махсус фермада боқилган.
Ҳайвонларни ташиш CargoPoint компанияси томонидан ташкил этилган бўлиб, у Йоханнесбург—Антананариву—Истанбул—Тошкент йўналиши бўйича 10 827 километр масофани босиб ўтган.
Пойтахт ҳайвонот боғи тарихида биринчи бўлган ушбу улкан лойиҳа Wildlife Care бошқарув компанияси томонидан амалга оширилган.
Эслатиб ўтамиз, 2022 йилнинг августида Тошкент ҳайвонот боғида Алатау лақабли 9 ёшли жирафа нобуд бўлганди. Ўлимдан кейинги патологоанатомик ва лаборатор текширувлари натижаларига кўра, ҳайвоннинг ўлими провентрикуляр тимпания туфайли юзага келган мия ишемияси туфайли содир бўлган.
Изоҳ (0)