ҲАМАС ва Исроил вақтинчалик сулҳни узайтириш бўйича музокаралар олиб бормоқда, деб ёзди The Wall Street Journal Миср ва Қатар расмийларига таяниб.
Нашр эслатишича, ҳар икки томон ҳам келишув муддатини узайтириш истагини ошкора баён қилган, унга кўра, ҲАМАС Исроил қамоқхоналаридаги 150 нафар фаластинлик асир эвазига гаровга олинган 50 нафар исроилликни озод қилишга ваъда берган.
WSJ хабарига кўра, ҳозир томонлар келишувни яна тўрт кун ёки ундан камроқ муддатга узайтириш имкониятини муҳокама қилмоқда. Нашр манбалари ушбу келишув доирасида ҲАМАС камида 20 нафар аёл ва болаларни гаровдан қўйиб юбориши мумкин. Шу билан бирга, Миср расмийларининг аниқлик киритишича, барча аёллар ва болалар озод этилганидан сўнг, биринчи ўринда ёши катта эркакларга, кейин эса ўлганларнинг жасадлари озод этилишига эътибор берилади, чунки ҲАМАС исроиллик ёш йигитларни озод қилиш имкониятини ҳозирча рад этиб келмоқда.
АҚШ президенти маслаҳатчиси Жейк Салливаннинг сўзларига кўра, келишувнинг узайтирилиши ҳозирда ҲАМАСга боғлиқ бўлиб турибди, чунки Исроил бош вазири Биньямин Нетаньяху ўз шарти — сулҳнинг ҳар бир қўшимча куни учун ўн нафар асир озод қилиниши кераклигини аллақачон эълон қилган. Шу билан бирга, гуруҳ ҳозирча озод этишга тайёр бўлганлар рўйхатини тақдим этмади, дея аниқлик киритди WSJ манбалари.
24 ноябрдан бери ҲАМАС тўрт кунлик сулҳ доирасида гаровга олинганларнинг уч гуруҳини озод қилди. Ҳаммаси бўлиб, битим давомида 39 нафар исроиллик ва 19 нафар хорижлик озод қилинди. Ўз навбатида Исроил 117 нафар фаластинлик маҳбусни озод этди.
7 октябрь куни Исроилга ҳужум қилган ҲАМАС жами 240 га яқин одамни асирга олганди.
Изоҳ (0)