Исроил президенти Исхак Герцог 27 ноябрь, душанба куни Қуддусда Х (собиқ Twitter) ижтимоий тармоғи эгаси Илон Маск билан учрашади. Маск бир қатор антисемитизм айбловларидан сўнг Исроилга ташриф буюришга қарор қилган. Бу ҳақда The Times of Israel давлат раҳбари идорасига таяниб ёзмоқда.
Америкалик тадбиркор билан суҳбатда Герцог “интернетда антисемитизмнинг кучайишига қарши кураш чоралари зарурлигини” таъкидламоқчи. Ғазо секторида ҲАМАС томонидан гаровга олинган баъзи шахсларнинг оила аъзолари ҳам учрашувга қўшилиши кутилмоқда.
Сўнгги ҳафталарда Маск Х платформасида антисемитизм ва нацистларга оид постлари туфайли танқид остига олинди. Хусусан, у фитна назарияси тарафдорининг яҳудий ҳамжамоаларини “оқ танлиларга нисбатан нафрат” тарқатишда айблаган, шунингдек, антисемитизмга қарши курашувчи Америка яҳудийлари ташкилоти — Antidiffamatsion liga — “де-факто оқ танлиларга қарши ирқчилик, осиёликларга қарши ирқчилик ёки ҳар қандай ирқчиликни тарғиб қилиши” ҳақида ёзилган твитни қўллаб-қувватлаган.
Бундан ташқари, Media Matters нотижорат ташкилоти Apple, Oracle ва IBM рекламаларига эътибор қаратди, улар Х’да Гитлер ва нацизмни мақтаган постлар ёнида кўрсатилган. Натижада, шу ва бошқа баъзи компаниялар Маскнинг ижтимоий тармоғидаги рекламаларини тўхтатишга қарор қилди.
Изоҳ (0)