Украина ҳудудидаги миналар ва портламаган ўқ-дорилар сони Европада Иккинчи жаҳон урушидан кейинги энг катта миқдор ҳисобланади. Бу ҳақда мамлакатдаги БМТ миналардан тозалаш дастури менежери Пол Ҳеслоп маълум қилди.
Мен Афғонистондан Сомалига қадар бутун дунёда 30 йил давомида миналарни зарарсизлантириш ишида қатнашдим. Менимча, уларнинг ҳаммаси шунчаки ўқув машғулоти бўлган, — дейди Ҳеслоп.
Украина расмийларига кўра, мамлакат ҳудудининг учдан бир қисмида — 20 миллион гектардан ортиқ майдонда 2 миллиондан ортиқ миналар бор. Охирги 18 ой ичида Украина бўйлаб 260 га яқин тинч аҳоли минага учраб ҳалок бўлди, дейди Киев расмийлари.
Аввал Швейцария Киев ҳукуматига масофадан бошқариладиган мина тозалаш машинаси, тиркамали юк машинаси ва уч йилга етадиган эҳтиёт қисмларини бериши хабар қилинганди. Ушбу техник воситаларнинг умумий қиймати 1,2 миллион франкни (1,35 миллион доллардан ортиқ) ташкил этади.
Изоҳ (0)