7 октябрдаги ҲАМАС ҳаракатининг Исроилга уюштирган ҳужумида яқинларини йўқотган ёки қариндошлари ҲАМАС томонидан гаровга олинган бир гуруҳ оилалар жума куни Кнессет (парламент) олдида йиғилиб, бош вазир Биньямин Нетаньяхунинг лавозимидан четлатилишини талаб қилишди. Бу ҳақида Jerusalem Post нашри хабар қилди.
Нашр намойишни уюштирган гуруҳ баёнотидан парча тақдим этди. Унда айтилишича, оилалар 16 кундан бери ҳар куни Кнессет олдида йиғилишмоқда, чунки улар “ҳукумат ўз обрўсини ҳимоя қилиш учун ҳаммани хавф остига қўяётган пайтда” уйда сабр қилиб кутиб ўтиришни исташмаяпти.
Қайд этилишича, эртага 25 ноябрь шанба оқшомида бир қатор норозилик гуруҳлари Қуддуснинг Аза кўчасида Нетаняхунинг истеъфосини талаб қилиб, намойиш ўтказиш ниятида.
Аввалроқ Исроил мухолифати етакчиси Яир Лапид бош вазир Биньямин Нетаньяхуни алмаштириш вақти келганини айтганди.
Изоҳ (0)