Аляскадаги кўчкида бир оиланинг тўрт аъзоси ҳалок бўлди

Аляска жануби-шарқида кўчки оқибатида камида тўрт киши ҳалок бўлди, деб хабар бермоқда NBC News.

25 ноябрь куни кечқурун қутқарувчилар 11 ёшли қизнинг жасадини топди. Аввалроқ унинг 16 ёшли опаси, 44 ёшли отаси ва 36 ёшли онаси ўлик ҳолда топилганди.

Икки киши ҳамон бедарак йўқолган: ўша оилага мансуб 12 ёшли болакай ва уларнинг 65 ёшли қўшниси — унинг 63 ёшли рафиқаси кўчкидан омон қолди.

20 ноябрь куни кечқурун 2 мингга яқин аҳоли истиқомат қиладиган балиқчилар қишлоғига тепаликдан кўчки ёпирилди. Эртаси куни кечқурун уч кишининг жасади топилди, деб хабар берган AP.

Кўчки оқибатида 54 та уй бошқа аҳоли пунктлари билан алоқадан узилган, уларда 45 га яқин одам қолиб кетган. Қутқарувчилар уларга қайиқларда озиқ-овқат, ёқилғи, сув ва дори-дармонларни етказиб берди.