Венгрия бош вазири Виктор Орбан Украина Россияни жанг майдонида мағлуб эта олмаслигини айтди. Орбан нутқининг тегишли қисми Х ижтимоий тармоғида (собиқ Twitter) Венгрия ҳукуматининг расмий вакили Золтан Ковач томонидан эълон қилинди.
Орбаннинг айтишича, Россиянинг Украинага нисбатан агрессиясини қабул қилиш мумкин эмас, аммо Ғарб давлатлари, унинг фикрича, бу конфликтни ҳал қилишнинг нотўғри йўлини танлаган. У Россия-Украина конфликти бошиданоқ “глобаллаштирилган” эмас, балки “маҳаллийлаштирилган” ва “яккаланган” бўлиши кераклигини айтди.
Венгрия бош вазирининг таъкидлашича, Ғарбнинг бу урушдаги стратегияси дастлаб Украина жанг қилиб, ғалаба қозониши, Россия эса мағлуб бўлиши, шундан сўнг Москвада музокара олиб бориш мумкин бўлган раҳбарият келиши бўлган.
“Стратегия шундай эди. Биз молиялаштирамиз, украиналиклар эса жанг қилади ва ўлади. Ҳозир биз бўлган жойда, украиналиклар жанг майдонида ғалаба қозона олмаслиги аниқ. Олдинги чизиқда (бу конфликтга) ечим йўқ. Руслар ютқазмайди. Москвада ҳеч қандай сиёсий ўзгаришлар бўлмайди. Бу ҳақиқат”, — дея хулоса қилди Орбан.
Изоҳ (0)