Россияда ўзбекистонлик она-бола пенсионерни ўмарди 

Россиянинг Санкт-Петербург шаҳрида 66 ёшли нафақахўр аёлни унинг квартирасини тозалаган ўзбекистонлик аёл ўмарди. Бу ҳақда “Газета.ру” хабар берди.

Маълум қилинишича, воқеа 24 ноябрь куни содир бўлган. Собиқ фаррош жабрланувчининг уйига келиб, тунаб қолишни сўраган ва розилик олган. Шу куни ўзбекистонлик аёл ва номаълум эркак жабрланувчининг хонасига кириб, унга пичоқ тираб, пул ундиришни бошлаган.

Натижада петербурглик аёл 340 минг рубль (тахминан 3 800 доллар), PIN кодли иккита банк картаси, иккита мобил телефон, бошқа жиҳозлар ва шахсий ҳужжатларини берган. Шундан сўнг жабрланувчини ухлатадиган дори ичишга мажбурлашган.

Эртаси куни жабрланувчининг қўшниси ҳолат юзасидан полицияга қўнғироқ қилган. Полиция зудлик билан жиноят содир этишда гумон қилиб, икки нафар Ўзбекистон фуқаросини – 51 ёшли аёл ва унинг 25 ёшли ўғлини қўлга олган. Уларга нисбатан “талончилик” моддаси бўйича жиноят иши қўзғатилган.