Россиянинг Санкт-Петербург шаҳри Красногвардейский туманидаги қурилиш майдончасида тупроқ кўчиши оқибатида ўзбекистонлик уч ишчи ҳалок бўлди. Бу ҳақда “78.ру” хабар берди.
Аниқланишича, 27 октябрь куни соат тахминан 15:00 да Шафировский проспектидаги крематорий ёнида экскаватор ёрдамида узунлиги 20 метр, чуқурлиги 4 метр бўлган дренаж қувурлари учун хандақ ётқизилган. Ўзбекистонлик уч нафар ишчи қазиш ишларини қўлда давом эттирган.
Шу пайт хандақ деворларининг бири қулаб тушган, оқибатда ишчиларни тупроқ босган. Қутқарувчилар етиб келгунига қадар уч кишининг жасади ер остидан чиқариб олинган. Ҳалок бўлганларнинг бари Ўзбекистон фуқаролари: 33 ва 43 ёшда, учинчисининг ёши аниқланмоқда. Красногвардейский тумани прокуратураси ишчиларнинг ўлими юзасидан тергов олиб бормоқда.
“Дастлабки маълумотларга кўра, хандақ девори қазиш вақтида қулаган. Текширув давомида ташкилот мансабдор шахсларининг меҳнатни муҳофаза қилиш талабларига мувофиқлиги нуқтаи назаридан ҳаракатларига ҳуқуқий баҳо берилади”, — дейилади хабарда.
Изоҳ (0)